'आप'ला 'स्पेशल' ट्रिटमेंट; उद्या शपथविधी आज सगळे निर्बंध हटवले

देशातील पाच राज्यांत नुकत्याच विधानसभा निवडणुका पार पडल्या. या पाचपैकी चार राज्यात भाजपाने जोरदार विजय मिळवला. यावेळी पंजाबमध्ये मात्र आमआदमी (Aam Aadami Party) पक्षाने बाजी मारली. तब्बल ९२ जागा मिळवत 'आप'ने ऐतिहासिक विजय मिळवला आहे. याच पार्श्वभूमीवर पंजाबचे १७ वे मुख्यमंत्री म्हणून आप नेते आणि मुख्यमंत्री पदाचे उमेदवार भगवंत मान हे शपथ घेणार आहेत. (Punjab Election 2022) या सोहळ्यासाठी आम आदमी पक्षाने जोरदार तयारी केली आहे. दरम्यान, मुख्यमंत्र्यांचा उद्या शपथविधी असल्यानं आज पंजाबमधील कोविड-१९ चे सर्व नियम मागे घेतले आहेत.

भगवंत मान यांच्या शपथविधीदरम्यान विशेष सुरक्षा व्यवस्था तैनात करण्यात येणार आहे. कार्यक्रमस्थळी विशेष चौक्या लावण्यात आल्या आहेत. यासोबतच सीआयडी आणि इतर गुप्तचर यंत्रणांची देखील या सोहळ्यावर पूर्ण नजर असणार आहे. भगवंत मान यांनी याआधीच पंजाबच्या जनतेला शपथविधी सोहळ्याला उपस्थित राहण्याचं निमंत्रण दिलं आहे. या ऐतिहासिक शपथविधीसाठी राज्यातील कोविड-१९ चे निर्बंधांत शिथिलता देण्यात आली आहे.

दरम्यान, पंजाबमध्ये पहिल्यांदाच आम आदमी पक्षाचा मुख्यमंत्री होणार आहे. त्यामुळे या तिहासक शपथविधी सोहळ्यासाठी आम आदमी पक्षाने जय्यत तयारी केली आहे. सोहळ्यावर सुमारे दोन कोटी रुपये खर्च करण्यात येणार आहेत. त्यासाठी मान्यता देण्यात आली आहे. मान यांनी अनेक दिग्गज्जांना निमंत्रण दिलं असून, या कार्यक्रमासाठी सहा हजार पोलिसांचा बंदोबस्त असणार आहे.