जम्मू-काश्मीरात आता पोलिस उपनिरीक्षकाची हत्या; दहशतवाद्यांनी अपहरणानंतर केलं ठार

जम्मू-काश्मीर पोलीस दलातील (Jammu and Kashmir Police) एका पोलिस उपनिरीक्षकाचा मृतदेह भातशेतीत पडलेला आढळून आल्यानं एकच खळबळ उडालीय. दहशतवाद्यांनी (Terrorists) ही घटना घडवून आणल्याचं मानलं जात आहे. मृतदेह पाहिल्यानंतर एसआयचे अपहरण करून निर्जनस्थळी नेण्यात आलं, त्यानंतर गोळ्या झाडून मृतदेह फेकून दिल्याचा अंदाज व्यक्त केला जात आहे.

सध्या स्थानिक पोलीस घटनास्थळी दाखल झाले आहेत. मृतदेह ताब्यात घेऊन पोस्टमार्टमसाठी पाठवण्यात आलाय. घटनास्थळावरून पुरावे गोळा करण्यात येत असल्याचं पोलिसांचं म्हणणं आहे. मृत एसआयचं नाव फारुख अहमद मीर (Farooq Ahmad Mir) रा. सांबुरा पंपोर असं आहे. पोलिसांनी सांगितलं की, एसआयचा मृतदेह सांबुरा येथील भाताच्या शेतात पडलेला आढळला. फारुख सध्या लेथपोरा इथं 23 Bn IRP मध्ये OSI म्हणून तैनात होते.

दोन दिवसांपूर्वी अनंतनागमध्ये दहशतवाद्यांनी सुरक्षा दलांवर ग्रेनेडनं हल्ला केला होता. यामध्ये एक तरुण जखमी झाला. ही घटना पडशाही बाग परिसरातील आहे. अहमदउल्ला असं जखमी पोलिसाचं नाव असून तो हेड कॉन्स्टेबल होता. जम्मू-काश्मीरमधील सुरक्षा यंत्रणांसाठी दहशतवादी हे नवं आव्हान बनलंय. गेल्या 2 महिन्यांत काश्मीरमध्ये दहशतवाद्यांकडून टार्गेट किलिंगच्या 6 घटना घडल्या. दहशतवाद्यांचा हा नवा मार्ग असून बहुतांश सदस्य लष्कर-ए-तौयबाशी (Lashkar-e-Taiba) संबंधित आहेत.