Gurmeet Ram Rahim: राम रहीम पॅरोलच्या मुद्द्यावरून हायकोर्टाकडून सरकारला झटका, आता कोर्टाच्या परवानगीशिवाय...

Gurmeet Ram Rahim

डेरा सच्चा सौदा प्रमुखाच्या पॅरोलबाबत पंजाब आणि हरियाणा उच्च न्यायालयाने मोठा निर्णय दिला आहे. कोर्टाच्या परवानगीशिवाय राम रहीमला भविष्यात पॅरोल देऊ नये, असे उच्च न्यायालयाने कडक शब्दात म्हटले आहे.

राम रहीम सध्या पॅरोलवर बाहेर असून त्याचा पॅरोल १० मार्च रोजी संपत आहे. न्यायालयाने राम रहीमला १० मार्च रोजी आत्मसमर्पण करण्यास सांगितले आहे. सुनावणीदरम्यान हायकोर्टाने हरियाणा सरकारला राम रहीम सारख्या किती कैद्यांना अशा प्रकारे पॅरोल देण्यात आला आहे हे खंडपीठाला सांगण्यास सांगितले. खंडपीठाने हरियाणा सरकारकडून याबाबत माहिती मागवली असून, त्यासाठी पुढील सुनावणीची तारीख निश्चित करण्यात आली आहे. (Latest Marathi News)

डेरा सच्चा सौदा प्रमुख गुरमीत राम रहीम, जो हरियाणामध्ये बलात्कार आणि हत्येप्रकरणी २० वर्षांची शिक्षा भोगत होता, त्याला चार वर्षांत नवव्यांदा ५० दिवसांसाठी पॅरोल देण्यात आला आहे. पॅरोलनंतर तो उत्तर प्रदेशातील बागपत येथील आपल्या पंथाच्या छावणीत राहत आहे. नोव्हेंबर २०२३ मध्ये त्याची २१ दिवसांची तुरुंगातून शेवटची सुटका झाली होती.

गेल्या वर्षी त्याला तीनदा पॅरोल मंजूर झाला होता. आतापर्यंत त्याला १८४ दिवसांसाठी पॅरोल आणि फर्लो देण्यात आला आहे. बलात्कार आणि खून प्रकरणात दोषी ठरल्यानंतर ऑगस्ट २०१७ पासून तो सुनारिया तुरुंगात बंद आहे. हरियाणा, पंजाब आणि उत्तर प्रदेशमध्ये त्यांचे मोठ्या संख्येने फॉलोअर्स आहेत.

राम रहीमला ऑगस्ट २०१७ मध्ये दोन महिलांवर बलात्कार केल्याप्रकरणी २० वर्षांची शिक्षा सुनावण्यात आली होती. जानेवारी २०१९ मध्ये पंचकुला येथील विशेष सीबीआय न्यायालयाने १६ वर्षांपूर्वी पत्रकार राम चंदर छत्रपती यांच्या हत्येप्रकरणी राम रहीम आणि इतर तिघांना जन्मठेपेची शिक्षा सुनावली होती. २५ ऑगस्ट २०१७ रोजी त्याच्या शिक्षेमुळे पंचकुला आणि सिरसा येथे प्रचंड हिंसाचार झाला, ज्यामध्ये ४१ लोक मारले गेले आणि २६० हून अधिक जखमी झाले.