Marriage : सुशिक्षित तरूणाचा पराक्रम! एक नवरदेव अन् 2 नवऱ्या, त्याही सख्ख्या बहिणी

जयपूर : राजस्थानातील जयपूर येथे एका तरूणाने दोन सख्खा बहिणीशी लग्न केल्याचा प्रकार समोर आला आहे. त्यामुळे पंचक्रोशीत हा चर्चेचा विषय ठरला असून या लग्नाची निमंत्रण पत्रिकासुद्धा सोशल मीडियावर चांगलीच व्हायरल झाली होती. या लग्नामध्ये नवऱ्या मुलाचे पाहुणे, मित्र आणि समाजातील मंडळी सहभागी झाले होते.

अधिक माहितीनुसार, राजस्थानातील उनियारा उपविभागातील मोरझालच्या झोपडिया गावातील ही घटना आहे. या गावातील हरिओम मीना या तरूणाला लग्नासाठी मुलगी शोधण्याचा कार्यक्रम सुरू होता. त्यावेळी निवई येथील सिद्रा गावात राहणाऱ्या बाबूलाल मीना यांची मोठी मुलगी कांता या तरूणीशी विवाह करण्यासंदर्भात पाहुणे मंडळींची बोलणी सुरू होती. हरिओम यांचे कुटुंबीय आणि पाहुणे मंडळी मुलगी पाहण्यासाठी गेले असता मुलगी असलेल्या कांता हिने मुलासमोर एक अट ठेवली.

मुलीने ठेवलेल्या अटीनुसार, कांता हिची लहान बहीण मानसिकदृष्ट्या कमकुवत आहे, त्यामुळे कांता हिला आपल्या लहान बहिणीला आयुष्यभर सांभाळायचं आहे. असं कांताने सांगितल्यावर हरिओम आणि त्याच्या कुटुंबियांनी ही अट मान्य केली आणि विवाहासाठीचा मार्ग मोकळा झाला. ५ मे रोजी हा विवाहसोहळा मोठ्या थाटामाटात पार पडला.

या लग्नाची निमंत्रणपत्रिका सुद्धा छापण्यात आली होती. यामध्ये सर्वांना आमंत्रित करण्यात आले होते. तर लग्नामध्ये दोघी सख्ख्या बहिणींनी हरिओम सोबत सात फेरे घेतले. हरिओमही सध्या स्पर्धा परिक्षेची तयारी करत असून दोन्ही बायकांना सुखी ठेवणार असल्याचं त्याने सांगितलं आहे.