पुलवामा चकमक: एक जवान शहीद, लष्कराने 4 दहशतवाद्यांना घेरलं

नवी दिल्ली- शुक्रवारी सकाळी जम्मू-काश्मीरमधील पुलवामा जिल्ह्यात सुरक्षा दल आणि दहशतवाद्यांमध्ये चकमक सुरु झाली आहे. भारतीय लष्कर, पुलवामा पोलीस आणि सीआरपीएफने या ऑपरेशनमध्ये भाग घेतला आहे. पुलवामातील हांजी राजपुरा येथे दहशतवादी लपले असल्याची माहिती संबंधित पोलिस अधिकाऱ्यांनी दिली आहे. चकमकीत एक जवान शहीद झाला आहे. एएनआयने यासंदर्भातील वृत्त दिलं आहे. (Encounter breaks out between terrorists and security forces in Hanjin Rajpora area of Pulwama ammu and Kashmir)

पुलवामा एन्काउंटरमध्ये दोन्ही बाजुंनी मोठ्या प्रमाणात गोळीबार झाला. संयुक्त सुरक्षा दलांनी या भागात सर्च ऑपरेशन सुरु केले होते. त्यानंतर चकमकीस सुरुवात झाली. राजपूरा भागातील हांजी गावामध्ये अनेक दहशतवाद्यांनी आश्रय घेतला असल्याची माहिती पोलिसांना मिळाली होती. त्यानंतर हे सर्च ऑपरेशन सुरु करण्यात आले.

सुरक्षा दल आणि पोलीस गावात पोहोचताच दहशतवाद्यांनी गोळीबार सुरु केला. त्यानंतर सुरक्षा दलांनी प्रत्युत्तर देण्यास सुरुवात केली. दोन्ही बाजुंनी मोठ्या प्रमाणात गोळीबार झाला. आतापर्यंत कोणत्याही नुकसानीची बातमी नाही. पण, कमीतकमी तीन ते चार दहशतवादी सुरक्षा दलांच्या जाळ्यात अडकल्याचं सांगितलं जातंय. दरम्यान, एका दिवसापूर्वी सुरक्षा दलांनी जम्मू-काश्मीरातील दोन दहशतवाद्यांचा खात्मा केला होता. मागील सहा महिन्यात सुरक्षा दलांनी 61 दहशतवाद्यांना संपवलं आहे.