आंतरराष्ट्रीय ऑलिम्पियाडमध्ये भारतीय मुलींना कांस्य पदक

मुंबई : ६ ते ११ एप्रिल दरम्यान हंगेरीतील एगर येथे पार पडलेल्या अकराव्या ‘मुलींच्या युरोपीय गणित ऑलिम्पियाड’ (इजीएमओ २०२२) स्पर्धेत भारतीय संघातील मुलींनी कांस्य पदके पटकावली आहेत. यात महाराष्ट्रातील दोन आणि दिल्लीतील दोन विद्यार्थिनींचा समावेश आहे.

नाशिकची सानिका बोराडे आणि पुण्याची अनन्या रानडे तसेच दिल्लीच्या अगरवाल भगिनी अनुष्का व गुंजन यांचा भारतीय संघात समावेश होता. अनन्या आणि अनुष्का यांचे रौप्य पदक केवळ एका गुणाने हुकले. संघासोबत ‘टाटा मूलभूत विज्ञान संशोधन संस्थे’च्या राष्ट्रीय समन्वयकांचा चमूही स्पर्धेसाठी रवाना झाला होता. यात पुण्याच्या वाडिया महाविद्यालयाच्या अदिती फडके, बंगळुरूच्या ‘भारतीय विज्ञान संस्थे’चे पुलकित सिन्हा आणि मुंबईच्या भारतीय प्रौद्योगिकी संस्थेच्या (आयआयटी मुंबई) रोहिणी जोशी यांचा समावेश आहे.