AIR INDIA त कुठलीही भरती नाही, घोटाळेबाजांपासून राहा सावध

मुंबई: सध्या एअर इंडियामध्ये (AIR INDIA) भरती निघाल्याची, नोकरीची संधी असल्याच्या जाहीराती फिरत आहेत. पण अशा कुठल्याही जाहीरातींवर विश्वास ठेवू नका, असे एअर इंडियाकडून स्पष्ट करण्यात आले आहे. काही घोटाळेबाज लोक एअर इंडियामध्ये भरती निघाल्याची, नोकरीची संधी (job opportunity) असल्याची जाहीरात करत असल्याचे आमच्या निदर्शनास आले आहे. कंपनीचं नाव, बनावट लेटर हेड (fake letter head) आणि एअर इंडिया लिमिटेडचा खोटा लोगो वापरुन हा सर्व प्रकार सुरु असल्याचं एअर इंडियाने म्हटलं आहे. (Fake Recruitment advertisements Beware from fraudsters AIR INDIA)

एअर इंडियामध्ये जेव्हा कधी अशी भरती निघते, त्यावेळी आघाडीच्या वर्तमानपत्रांमध्ये आम्ही जाहीरात देतो तसेच एअर इंडियाच्या वेबसाइटवरही अशा भरती प्रक्रियेची माहिती दिली जाते, असे एअर इंडियाने म्हटले आहे.

अशा घोटाळेबाज लोकांबरोबर व्यवहार करताना जनतेचं कुठलं नुकसान झालं, तर त्याला कंपनी जबाबदार असणार नाही, असे एअर इंडियाने स्पष्ट केले आहे.