UP : आनंदाच्या क्षणी काळाचा घाला; लग्न घरी आगीचा भडक्यात पाच जणांचा होरपळून मृत्यू

लग्नघरी आगा लागून पाच जणांचा होरपळून मृत्यू झाल्याची ह्रदयद्रावक घटना समोर आली आहे. या घटनेमुळे परिसरात हळहळ व्यक्त करण्यात येत असून, ही आग शॉर्ट सर्किटमुळे लागल्याचा प्राथमिक अंदाज व्यक्त करण्यात आला आहे. उत्तर प्रदेशमधील मोरादाबाद जिल्ह्यात ही घटना घडली आहे अशी माहिती मोरादाबादचे न्यायदंडाधिकारी शैलेंद्र कुमार सिंह यांनी दिली आहे. एकाच कुटुंबातील सदस्य या इमारतीत राहत होते.

दरम्यान, आगीची माहिती मिळताच अग्निशमन दलाचे पाच बंब घटनास्थळी दाखल झाले आणि जवानांनी आगीवर नियंत्रण मिळवले. मोरादाबादमधील तीन मजली इमारतीत ही भीषण आग लागली होती. त्यात पाच जणांचा होरपळून मृत्यू झाला. तर सात जण जखमी झाले आहेत. मृतांमध्ये दोन लहान मुलांचा समावेश आहे.

आग लागलेल्या इमारतीत अमरुद्दीन त्यांच्या कुटुंबासमवेत तिसऱ्या मजल्यावर राहत होतो. रात्री आठ वाजता अचानक घराच्या पहिल्या मजल्यावर आग लागली. यामध्ये सासू समर जहाँ, सून शमा, मुलगी नाफिया, मुलगा इबाद यांचा मृत्यू झाला. तर एकाचा उपचारादरम्यान मृत्यू झाला. घटनेनंतर ही आग नेमकी कशी लागली याचा तपास अग्निशमन दलाकडून केला जात असून, लग्नघरी आनंदाच्या क्षणी अशा प्रकारची घटना घडल्याने परिसरातील नागरिकांकडून हळहळ व्यक्त केली जात आहे.