झोपेतच घराला भीषण आग, एकाच कुटुंबातील पाच जणांचा मृत्यू

झोपेत असताना घराला भीषण आग (Fire) लागली. शेजाऱ्यांनी त्यांना सावध करण्याचा प्रयत्न केला. पण, दुर्दैवानं शेजाऱ्यांचा आवाज पण त्यांनी ऐकला नाही. या भीषण आगीत एकाच कुटुंबातील पाच जण जळून ठार झालेत. यामध्ये ८ महिन्याच्या बाळाचा देखील समावेश आहे.

केरळमधील वरकाळाजवळील (Varkala Kerala) चेरुन्नीयूर येथे ही घटना घडली आहे. प्रथापन, त्यांची पत्नी शेर्ली, सून अभिरामी, मुलगा अखिल आणि ८ महिन्याचा नातू रियान, अशी मृतांची नावे आहेत. यामध्ये प्रथापन यांचा लहान मुलगा गंभीर असून त्याच्या रुग्णालयात उपचार सुरू आहेत.

घराला आग लागली तेव्हा शेजाऱ्यांनी प्रथापन यांच्या कुटुंबीयांना सावध करण्याचा प्रयत्न केला. पण, त्यांना आवाज ऐकू गेला नाही. एका शेजाऱ्यानं आग लागल्याची माहिती देण्यासाठी फोन केला. पण, तो फोन देखील त्यांनी उचलला नाही. त्यानंतर शेजाऱ्यांनी पहाटे पावणेतीन वाजण्याच्या सुमारास अग्नीशमन दलाला फोन केला. अग्नीशमन दलाचे जवान घटनास्थळी पोहोचताच घरातील सर्व खोल्या जळाल्या होत्या. तसेच पाच जणांचा मृत्यू झाला होता, तर एक जण गंभीर होता. त्याला तत्काळ रुग्णालयात हलवण्यात आले.

आग इतकी भीषण होती की घरापुढे ठेवलेल्या तीन दुचाकी देखील जळून खाक झाल्या आहेत. घरात व्हेंटीलेशन नव्हते. तसेच पूर्ण खोल्यांमध्ये एसी होता. त्यामुळे आगीने रौद्र रुप धारण केले असावे. त्यातच घरातील पाच जणांचा गुदमरून मृत्यू झाला असून आगीचे कारण अद्यापही समजू शकले नाही, असे अग्नीशमन दलाच्या अधिकाऱ्यांनी सांगितले.