OYO रुममध्ये छुपा कॅमेरा लावून जोडप्यांचे खासगी क्षण केले रेकॉर्ड, त्यानंतर...

नवी दिल्ली : उत्तर प्रदेशातील नोएडातील ओयो हॉटेलमध्ये छुपे कॅमेरे लावून जोडप्यांचे खासगी क्षण रेकॉर्ड करणाऱ्या टोळीचा पर्दाफाश करण्यात आला आहे. याप्रकरणी पोलिसांनी चार जणांना अटक केली आहे. नोएडातील गुन्हेगारी कारवायांमध्ये सहभागी असलेल्या अन्य टोळ्यांशीही आरोपींचा संबंध होता, असेही सांगण्यात आलं आहे. (OYO room news in Marathi)

आरोपींनी हॉटेलच्या खोल्यांमध्ये छुप्या कॅमेऱ्याने जोडप्यांचे व्हिडिओ रेकॉर्ड केले. त्यानंतर जोडप्यांना ब्लॅकमेल करून पैशांची मागणी करण्यात आली, अशी माहिती पोलिसांनी दिली. तसेच पैसे देण्यास नकार देणाऱ्याला आरोपींनी व्हिडिओ लीक करण्याची धमकी दिली. या रॅकेटमध्ये हॉटेलच्या कर्मचाऱ्यांचा सहभाग नसल्याचं प्राथमिक तपासात निष्पन्न झालं आहे.

पोलिसांनी सांगितले की, टोळीच्या सदस्यांनी आधी ओयो हॉटेल्समधील खोल्या बुक केल्या. त्यानंतर चेकआउट करण्यापूर्वी आरोपींनी खोल्यांमध्ये छुपे कॅमेरे लावले. काही दिवसांनी हे लोक पुन्हा हॉटेल्समध्ये गेले आणि त्यांनी कॅमेरे बाहेर काढले. त्यानंतर त्यांनी जोडप्यांशी संपर्क साधून पैशांची मागणी केली. पैसे देण्यास नकार देणाऱ्यांना आरोपींनी व्हिडिओ लीक करण्याची धमकी दिली होती.