Mukhtar Ansari : अन्सारीचा बंदोबस्तात दफनविधी

गाझीपूर/लखनौ : कुख्यात गुंड आणि नेता मुख्तार अन्सारी याच्यावर आज गाझीपूरच्या कालीबाग येथे अन्सारी कुटुंबीयांच्या मालकीच्या मैदानात दफनविधी करण्यात आला. यावेळी गर्दी होती आणि घोषणाबाजीचा प्रकारही घडला. स्थानिक प्रशासनाने अन्सारीचे निवासस्थान आणि स्मशानभूमी परिसरात कडक बंदोबस्त ठेवला होता.

मुख्तार अन्सारी याचे गुरुवारी हृदयविकाराच्या झटक्याने निधन झाले. कुटुंबाने दिलेल्या माहितीनुसार, अन्सारीचा पार्थिव शुक्रवारी मध्यरात्री त्याच्या घरी आणण्यात आला आणि त्यानंतर घरीच दफनविधीपूर्वीचे विधी पार पाडले. त्याच्या अंत्ययात्रेत त्याचा मोठा भाऊ खासदार अफजल अन्सारी, मुलगा उमर अन्सारी, पुतण्या आमदार सुहेब अन्सारी, कुटुंबातील अन्य सदस्य आणि समर्थक सामील झाले होते. यावेळी काही समर्थकांनी घोषणाबाजी केली. स्मशानभूमित अंत्ययात्रा पोचल्यानंतर अफजल अन्सारीने शांतता बाळगण्याचे आवाहन केले.

त्याचा मोठा भाऊ माजी आमदार सिबगतुल्लाह अन्सारी देखील हजर होता. मात्र मोठा मुलगा आणि आमदार अब्बास अन्सारी हा तुरुंगात असल्याने दफनविधीला उपस्थित राहू शकला नाही. तो अनेक गुन्ह्याखाली कासगंज तुरुंगात आहे. दरम्यान, गाझीपूरच्या जिल्हाधिकारी आर्यका अखौरी यांनी मुख्तार अन्सारी याच्या अंत्ययात्रेच्या वेळी दिलेल्या घोषणांची गंभीर दखल घेतली असल्याचे सांगितले. घोषणाबाजी करणाऱ्यांची ओळख पटविली जाईल आणि त्यांच्याविरुद्ध कारवाई होईल, असे सांगितले