'PM मोदी जीन्स घालणाऱ्या मुलींना आवडत नाहीत' काँग्रेस नेत्याचे वक्तव्य

काँग्रेसचे ज्येष्ठ नेते दिग्विजय सिंह (Digvijay SIngh) हे नेहमीच त्यांच्या विधानांमुळे चर्चेत असतात. आता त्यांनी मोदींबद्दल (PM Narendra Modi) वादग्रस्त असं वक्तव्य केलं आहे. मध्य प्रदेशची (Madhya Pradesh) राजधानी भोपाळमध्ये (Bhopal) एका कार्यक्रमात ते बोलत होते. प्रियांका गांधी (Priyanka Gandhi) यांच्या 'लडकी हूँ, लढ सकती हूँ' या घोषणेबाबत बोलताना दिग्विजय सिंह म्णाले की, पंतप्रधान मोदी हे जीन्स घालणाऱ्या मुलींना आवडत नाहीत. तर त्यांचा प्रभाव फक्त ४० वर्षांवरील महिलांवर आहे.

दिग्विजय सिंह हे जन जागरण मोहिमे अंतर्गत आयोजित कार्यक्रमात बोलत होते. ते म्हणाले की, जीन्स घालणाऱ्या मुली आणि फोन असणाऱ्या मुलींना मोदी आवडत नाहीत. फक्त ४० ते ५० वयाच्या महिलांवर मोदींचा प्रभाव आहे. तसंच भाजपला २०२४ मध्ये पुन्हा सत्ता मिळाली तर भारताची राज्यघटना बदलली जाईल, आरक्षण संपुष्टात येईल असंही दिग्विजय सिंह यांनी म्हटलं.

गोमांस खाण्याबाबतही त्यांनी वक्तव्य केलं आहे. ते म्हणाले की, 'काही हिंदू गोमांस खातात आणि काही खात नाहीत. काहीजण गोहत्येच्या विरोधात आहेत. पण, स्वतः सावरकरांनी (Sawarkar) आपल्या पुस्तकात लिहिलंय, की हिंदू धर्माचा हिंदूत्वासोबत संबंध नाही. गाय स्वतःच्या मल-मुत्रामध्ये लोळतेय तर ती आपली माता कशी काय होऊ शकते? गोमांस खाणं वाईट नाही, असं स्वतः सावरकरांनी म्हटलंय. सध्या भाजप त्यांच्याच विचारावर चालत असल्याचंही दिग्विजय सिंह यांनी याच कार्यक्रमात म्हटलं होतं.

काँग्रेस नेते राहुल गांधी (Rahul Gandhi) यांनी भाजपचं हिंदूत्व ढोंगी आहे. हिंदूत्ववाद्यांमुळे देशाला, देशाच्या एकात्मेला धोका आहे असा आरोप केला होता. त्यावर बोलताना दिग्विजय सिंह यांनी सावरकरांच्या विचारांचा दाखला देत भाजपला हिंदूत्वावरून डिवचलं आहे. भाजप आणि आरएसएस सावरकरांना मानतात. पण, स्वतः सावरकरांनी हिंदू आणि हिंदूत्व या दोन्ही वेगळ्या गोष्टी असल्याचं आपल्या पुस्तकामध्ये लिहिल्याचं दिग्विजय सिंह यांनी सांगितलं.