उत्पल पर्रीकर अपक्ष लढणार, की केजरीवालांची ऑफर स्वीकारणार? लवकरच स्पष्ट

पणजी : भाजपने गोवा विधानसभा निवडणुकीसाठी (Goa Assembly Election 2022) ३४ जागांसाठी उमेदवारांची यादी जाहीर केली आहे. मात्र, यामध्ये गोव्यातील दिवंगत नेते मनोहर पर्रीकर (Manohar Parrikar) यांचा मुलगा उत्पल पर्रीकर (Utpal Parrikar) यांना तिकीट देण्यात आलं नाही. त्यानंतर उत्पल हे आज पत्रकार परिषद घेऊन त्यांची भूमिका मांडणार आहे. ते केजरीवालांची ऑफर स्वीकारतात की अपक्ष लढण्याचा निर्णय घेतात? हे पाहणे महत्वाचे ठरणार आहे.

मी आज पत्रकार परिषद घेणार आहे. त्यावेळी गोवा विधानसभा निवडणुकीबाबत मी माझी भूमिका मांडणार आहे, अशी माहिती उत्पल पर्रीकर यांनी एएनआयला दिली आहे. त्यामुळे आता उत्पल काय निर्णय घेतात? याकडे सर्वांचं लक्ष लागलं आहे.

केजरीवालांनी दिली ऑफर? -

दिल्लीचे मुख्मंत्री अरविंद केजरीवाल यांच्या आम आदमी पक्षाने पहिल्यांदाच गोव्यात पाऊल ठेवले आहे. केजरीवाल हे गोव्यात घरोघरी जाऊन प्रचार करत आहेत. तसेच भाजपने उत्पल पर्रीकर यांना तिकीट दिले नाही. त्यानंतर त्यांनी उत्पल आपमध्ये आल्यास त्यांचं स्वागत आहे, अशी खुली ऑफर केजरीवालांनी दिली. आता उत्पल ही ऑफर स्वीकारतात का? हे पाहणे देखील महत्वाचे आहे.

देवेंद्र फडणवीस काय म्हणाले होते? -

गोवा निवडणुकीचे प्रभारी देवेंद्र फडणवीस यांनी गुरुवारी ३४ उमेदवारांची यादी जाहीर केली. यामध्ये उत्पल पर्रीकरांना पणजीतून उमेदवारी हवी होती तिथून काँग्रेसमधून आलेल्या मोन्सेरात यांना उमेदवारी दिली. तसेच उत्पल यांना दोन वेगळ्या ठिकाणाहून ऑफर दिली होती. मात्र, ती त्यांनी नाकारली. पण, त्यांच्यासोबत चर्चा सुरू आहे, असं देवेंद्र फडणवीस म्हणाले.