ज्योतिरादित्य शिंदेंचं इन्स्टाग्राम अकाऊंट पुन्हा हॅक; पोस्ट केला त्याचप्रकारचा व्हिडीओ

नवी दिल्ली : केंद्रीय मंत्री ज्योतिरादित्य शिंदे यांचे इन्स्टाग्राम अकाऊंट हॅक झालं आहे. शनिवारी जवळपास एक तासभर हे अकाऊंट हॅकरच्या हातात होते. हॅकरने इन्स्टाग्राम अकाऊंटचे नाव बदलून श्रेया अरोरा असं ठेवलं होतं. सोबतच एक असा व्हिडीओ पोस्ट केला होता, ज्यामध्ये त्यांनी काँग्रेसमध्ये असताना दिलेलं भाषण आहे, ज्यात ते भाजपवर टीका करताना दिसतात. ज्योतिरादित्य शिंदे यांच्यासोबत याआधी देखील असाच प्रकार घडला आहे. मिळालेल्या माहितीनुसार, ज्योतिरादित्या शिंदे यांचे इन्स्टाग्राम अकाऊंट सकाळी जवळपास 10.45 वाजता हॅक करण्यात आलं होतं.

शिंदे यांनी मार्च 2020 मध्ये भाजपमध्ये प्रवेश केला होता. त्यांना ऑगस्ट 2021 मध्ये केंद्रीय कॅबिनेटच्या विस्तारामध्ये केंद्रीय मंत्रीपद देण्यात आलं होतं. त्यावेळी देखील त्यांचं अकाऊंट हॅक झालं होतं. तेंव्हा देखील याचप्रमाणे एक जुना व्हिडीओ पोस्ट करण्यात आला होता. याचप्रकारे गेल्या वर्षी जेंव्हा त्यांची राज्यसभेमध्ये निवड झाली तेंव्हा देखील त्यांच्या फेसबुक अकाऊंट हॅक झालं होतं. या व्हिडीओमध्ये ज्योतिरादित्य शिंदे भाजप सरकारवर जोरदार टीका करताना दिसून येतात. त्यामुळे विशिष्ट राजकीय आकसापोटीच त्यांचं हे अकाऊंट हॅक करण्यात येत असल्याचा संशय आहे.