Hijab Row: कर्नाटकात शैक्षणिक संस्थांभोवती दोन आठवडे 144 कलम लागू

बंगळुरू : कर्नाटकात सुरु असलेल्या हिजाब (Hijab Issue In Karnataka) प्रकणानंतर बेंगळुरूमधील शैक्षणिक संस्थांभोवती कलम 144 लागू करण्यात आले असून, पुढील दोन आठवडे शैक्षणिक संस्थांच्या 200 मीटर परिसरात आंदोलन करता येणार नाही, असे आदेश पोलिसांकडून देण्यात आले आहेत. नव्याने जारी करण्यात आलेले आदेश आजपासून लागू करण्यात आल्याचेही पोलिसांना स्पष्ट केले आहे. (Section 144 Imposed For Educational Institution )

धार्मिक पेहराव हिजाबवर बंदी घालण्याच्या आदेशानंतर कर्नाटकातील शाळा आणि महाविद्यालयांमध्ये खळबळ उडाली आहे. कर्नाटक आणि तेथील शाळा-महाविद्यालयांमधून हा वाद देशभरात पोहोचला आहे. (Hijab Protest In Karnataka) आता विविध पक्षांचे राजकारणीही यावरून आमने-सामने आले आहेत. दरम्यान, या प्रकरणानंतर प्रियंका गांधी, असदुद्दीन ओवैसी, केशव मौर्य, व्हीके सिंग आदी नेत्यांनी प्रतिक्रिया व्यक्त केल्या असून, प्रियंका गांधी हिजाबबाबत मुस्लिम मुलींच्या समर्थनार्थ पुढे आल्या आहेत. तर, या मुद्द्यावरून द्वेष पसरवला जात असल्याचे मत ओवैसी यांनी व्यक्त केले आहे. दुसरीकडे भाजपने कायदा आणि ड्रेस कोडचा हवाला देत हिजाबला चुकीचे म्हटले आहे.

देशाची गृहयुद्धाकडे वाटचाल

हिजाब प्रकरणावर देशभरात प्रतिक्रिया उमटत असताना आता या वादावर लालू प्रसाद यादव यांनी देखील वक्तव्य केले आहे. देश गृहयुद्धाकडे वाटचाल करत असल्याचे लालू प्रसाद यादव म्हणाले.