Narendra Modi : मोदीजींची लोकप्रियता भाजपसाठी 'ट्रम्प कार्ड', निवडणुकीत होणार फायदा - CM धामी

Himachal Pradesh Election 2022 : भाजप हिमाचल प्रदेश विधानसभा निवडणुकीनंतर पुन्हा एकदा सत्तेत येण्यासाठी तयार आहे. यासाठी मुख्यमंत्री पुष्कर सिंह धामी हिमाचलमध्ये भाजपचा प्रचार करत आहेत. पंतप्रधान नरेंद्र मोदींची (Narendra Modi) लोकप्रियता हे भारतीय जनता पक्षासाठी (भाजप) ट्रम्प कार्ड आहे, असं उत्तराखंडचे मुख्यमंत्री पुष्कर सिंह धामी (Uttarakhand CM Pushkar Singh Dhami) यांनी म्हटलंय.

हिंदुस्तान टाइम्सला दिलेल्या मुलाखतीत धामी म्हणाले, 'उत्तराखंड सरकार लवकरच समान नागरी संहितेचा (Uniform Civil Code) मसुदा प्रस्ताव तयार करणार आहे. गुजरात आणि हिमाचल प्रदेशची राज्य सरकारंही सत्तेत परतल्यानंतर ही पावलं उचलणार आहेत.' सीएम धामी हे पुढील महिन्यात होणाऱ्या हिमाचल प्रदेश विधानसभा निवडणुकीत भाजपच्या स्टार प्रचारकांपैकी एक आहेत.

मुख्यमंत्री पुढं म्हणाले, भारतातील हिमालयीन राज्यांसाठी पंतप्रधान मोदींनी जेवढं कष्ट केलं, तेवढं कोणीही केलं नाही. त्यांनी (पीएम मोदी) उत्थान आणि विकासासाठी काम केलं आहे. मी जिथं-जिथं प्रचारासाठी गेलो आहे, तिथं काम करणाऱ्यांनाच मतदान केलं जाईल असं सांगण्यात येत आहे. छोट्या निवडणूक लढाईतही सत्ताविरोधी लाटेचा मुकाबला करण्यासाठी पंतप्रधान मोदींची वैयक्तिक लोकप्रियता भाजपचं ट्रम्प कार्ड आहे. विधानसभा निवडणुकीतही हे ट्रम्प कार्ड निर्णायक ठरेल, असा विश्वासही धामींनी व्यक्त केला.