Himachal Pradesh Politics : अखेर 'त्या' ९ आमदारांचा भाजपमध्ये प्रवेश; हिमाचल प्रदेशमध्ये काँग्रेसला धक्का

Himachal Pradesh Politics : हिमाचल प्रदेशातील राजकीय संघर्षामध्ये शनिवारी काँग्रेसला मोठा फटका बसला. नऊ आमदारांनी थेट भाजपमध्ये प्रवेश केला. यामध्ये काँग्रेसच्या अपात्र ठरविण्यात आलेल्या सहा आणि राजीनामा दिलेल्या तीन अपक्षांचा समावेश असल्याची माहिती सूत्रांनी दिली.

राज्यामध्ये सुखविंदरसिंह सुक्खू यांच्या नेतृत्वाखालील सरकार स्थापन झाल्यापासून विकासकामेच थांबली असल्याचा आरोप बंडखोरांनी केला आहे. या बंडखोर आमदारांनी केंद्रीयमंत्री अनुराग ठाकूर, हिमाचल प्रदेशचे माजी मुख्यमंत्री जयराम ठाकूर, राष्ट्रीय सरचिटणीस अरुण सिंह आणि राज्य प्रभारी राजीव बिंदाल यांच्या उपस्थितीत भाजपमध्ये प्रवेश केला.

या सर्व नेत्यांचे स्वागत करताना मंत्री अनुराग ठाकूर म्हणाले,‘‘ या आमदारांच्या आगमनामुळे भाजप आणखी मजबूत होईल. विद्यमान राज्य सरकार लोकांना दिलेली आश्वासने पूर्ण करण्यात अपयशी ठरत असल्याने जनतेमध्ये मोठा क्षोभ आहे. यातील काँग्रेसच्या सहा आमदारांनी राज्यसभा निवडणुकीच्यावेळी भाजपच्या उमेदवाराला पाठिंबा दिला होता त्यांच्या या कृतीमधून जनतेच्या मनातील रागाची भावनाच दिसून येते.’’

भाजपमध्ये प्रवेश करणाऱ्या काँग्रेसच्या आमदारांमध्ये सुधीर शर्मा, रवी ठाकूर, राजिंदर राणा, इंदरदत्त लखनपाल, चैतन्य शर्मा आणि देविंदरकुमार भुत्तो यांचा समावेश आहे. या सर्वांना पक्षाचा आदेश न पाळल्याने अपात्र ठरविण्यात आले होते. आशिष शर्मा, होशियार सिंह आणि के.एल. ठाकूर या अपक्ष आमदारांनी देखील भाजपमध्ये प्रवेश केला आहे. काही दिवसांपूर्वीच त्यांनी राजीनामा दिला होता.