हिंदू मंदिरांत अजानपेक्षा मोठ्या आवाजात हनुमान चालिसा म्हणणार : श्रीराम सेना

बेळगाव : महाराष्ट्रात मनसेच्या (MNS) वतीनं मशिदीवरील भोंगे उतरवण्यासाठी आंदोलन सुरुय. तर, दुसरीकडं येत्या 9 मे पासून पहाटे 5 पासून कर्नाटक राज्यातील मंदिरामध्ये अजानपेक्षा जास्त आवाजात हनुमान चालिसा म्हणण्यात येईल, अशी माहिती श्रीराम सेनेचे (Shriram Sena) राष्ट्रीय प्रमुख प्रमोद मुतालिक (Pramod Muthalik) यांनी पत्रकार परिषदेत दिली.

बेळगाव (Belgaum) शहरातील कन्नड साहित्य भवनात आयोजित करण्यात आलेल्या पत्रकार परिषदेत पत्रकारांशी बोलताना मुतालिक यांनी ही माहिती दिलीय. राज्यातील हिंदू मंदिरात भजन व हनुमान चालिसा (Hanuman Chalisa) मुस्लिमांच्या (Muslim) अजाणपेक्षा दुप्पट आवाजात म्हणण्यात येणार आहे, असंही त्यांनी स्पष्ट केलं.

आपला अजानला विरोध नसून त्यामुळं होणाऱ्या कर्णकर्कश आवाजामुळं होणाऱ्या त्रासाला विरोध आहे. यामुळं कर्नाटकात देखील माईक जप्तीची कारवाई झाली पाहिजे. भाजप सरकारनं (BJP Government) मुस्लिमांच्या माईक विरोधात कारवाई केली नाही, तर तुमचे 150 चे मिशन साकार होणार नाही. मुस्लिमांचे एकही मत भाजपला पडत नाही, तरी देखील त्यांची पर्वा का? असा सवाल त्यांनी उपस्थित केलाय.