दहशतवादी कारवायांसाठी हैदराबाद सुरक्षित : भाजप खासदार

हैदराबाद : हैदराबाद हे शहर दहशतवादी कारवायांसाठी सुरक्षित असल्याचे वक्तव्य भाजपचे खासदार बंडारू दत्तात्रेय यांनी केले. एनआयएनने आयसीसशी संबंधित असलेल्या तिघांना ताब्यात घेतल्यानंतर दत्तात्रेय यांनी प्रतिक्रिया दिली. यासंबंधी त्यांनी राज्यसरकारवरही टीका केली. 

'राष्ट्रीय तपास पथकाने हैदराबादमध्ये नुकत्याच केलेल्या कारवाईवरून हे सिद्ध झाले आहे की, दहशतवादी कारवायांसाठी हैदराबाद हे सुरक्षित आणि पुरक ठिकाण आहे. येथे दहशतवाद्यांच्या संख्येत वाढ होत आहे, तसेच यापूर्वी दहशतवादी कारवायांसाठी हैदराबादमधून मोठ्य़ा प्रमाणात भरती करण्यात आली होती,' असे खा. दत्तात्रेय यांनी सांगितले.

या प्रकरणी योग्य कारवाई व्हावी व राज्यसरकारने याकडे लक्ष द्यावे, पोलिस महानिरिक्षक दर्जाच्या अधिकाऱ्यांच्या अध्यक्षतेखाली विशेष पथके नेमावीत, अशी मागणी खासदार बंडारू दत्तात्रेय यांनी केली.