Weather Updates: यंदा मान्सून कधी होणार दाखल? मान्सूनबाबत हवामान विभागाने दिली माहिती, अंदमानमध्ये 'या' तारखेला एन्ट्री

महाराष्ट्रासह देशभरात अनेक ठिकाणी गेल्या काही दिवसांपासून अवकाळी पाऊस सुरुच आहे. राज्यातील अनेक भागात अवकाळी पावसासह गारपीटीचा मोठा फटका बसला. अशातच आणखी एक महत्त्वाची बातमी समोर आली आहे. हवामान खात्याच्या अंदाजानुसार यंदा मान्सून वेळेआधीच दाखल होण्याची शक्यता आहे. यावर्षी सरासरीपेक्षा जास्त पाऊस होण्याची शक्यता हवामान खात्याने वर्तवली आहे. त्यानुसार पाहा मान्सून कधी दाखल होऊ शकतो.

नैर्ऋत्य मोसमी पाऊस (मॉन्सून) रविवारी (ता. १९) त्याची पहिली हजेरी दक्षिण अंदमानचा समुद्र, आग्नेय बंगालच्या उपसागरातील काही भाग आणि दक्षिण निकोबार बेटांमध्ये लावेल. मॉन्सून २१ मेपर्यंत पोर्टब्लेअरमध्ये हजेरी लावतो. त्याआधी त्याची दमदार हजेरी दक्षिण अंदमानच्या समुद्रात लागते. या वर्षी रविवारी मॉन्सून अंदमान समुद्रात दाखल होईल, अशी माहिती भारतीय हवामान विभागाचे प्रमुख के. एस. होसाळीकर यांनी दिली आहे. दरवर्षी 22 मे रोजी मान्सून या भागात पोहोचतो, मात्र यंदा तो तीन दिवस आधी दाखल होणार आहे.

केरळमध्ये १ जूनच्या आसपास मान्सून दाखल होत असतो. त्यानंतर तो उत्तरेकडे सरकतो. 15 जुलैदरम्यान तो संपूर्ण देशभरात पोहोचतो. यंदा देशात सरासरीपेक्षा जास्त पाऊस पडेल, असा अंदाज आधीच हवामान खात्याने व्यक्त केला आहे.

यंदा १९ मे रोजी मॉन्सून अदमान समुद्रात दाखल होण्याची शक्यता आहे. गेल्यावर्षी देखील १९ मे रोजी मॉन्सून दक्षिण अंदमानात दाखल झाला होता. तर आगमन लांबल्याने ८ जून रोजी केरळमध्ये दाखल झालेला मॉन्सून ११ जून रोजी महाराष्ट्राच्या तळ कोकणात पोचला होता.

यंदा नैऋत्य मोसमी वाऱ्यांच्या (मॉन्सून) हंगामात जून ते सप्टेंबर या कालावधीत यंदा १०६ टक्के पाऊस पडण्याचा अंदाज भारतीय हवामानशास्त्र विभागाने (आयएमडी) जाहीर केला. या अंदाजात पाच टक्के कमी-अधिक पाऊस पडण्याची शक्‍यताही गृहीत धरण्यात आली आहे.