मनी लॉन्ड्रिंग प्रकरण : ईडीच्या अटकेत असलेल्या IAS अधिकारी पूजा सिंघल निलंबित

झारखंडमध्ये (Jharkhand) मनी लॉन्ड्रिंग प्रकरणी (Money laundering Case) IAS अधिकारी पूजा सिंघल (Pooja Singhal) यांच्यावर मोठी कारवाई करण्यात आलीय. अनेक तासांच्या चौकशीनंतर ईडीनं (ED) काल त्यांना अटक केलीय. अलीकडेच ईडीनं पूजा सिंघल यांच्या जवळच्या नातेवाईकांच्या रांची आणि इतर ठिकाणी छापे टाकले होते. या छाप्यादरम्यान ईडीला 19 कोटींहून अधिक रोख आणि अनेक महत्त्वाची कागदपत्रे मिळाली आहेत.

दरम्यान, ईडीनं अटक केल्यानंतर आयएएस अधिकारी आणि झारखंडच्या (Jharkhand) खाणकाम खात्याच्या सचिव पूजा सिंघल यांना निलंबित करण्यात आलंय. बुधवारी ईडीनं (ED) मोठी कारवाई करत सचिव पूजा सिंघल यांना आज अटक केली. गेल्या दोन दिवसांपासून ईडीकडून त्यांची चौकशी सुरू होती. खुंटी आणि इतर ठिकाणी राबवण्यात आलेल्या मनरेगा योजनेच्या निधीत गैरव्यवहार केल्याचा ठपका ठेवत ईडीनं ही कारवाई केलीय.

पूजा सिंघल यांची मंगळवारी सुमारे नऊ तास चौकशी करण्यात आली. त्यानंतर आज पुन्हा सकाळी पावणेअकरापासून ईडीकडून त्यांची चौकशी करण्यात आली आणि त्यांचा जबाब नोंदवला गेला. चौकशीदरम्यान त्यांनी बचावात्मक पवित्रा घेतला आणि त्यानंतर त्यांना अटक करण्यात आली. अधिक चौकशीसाठी त्यांची कोठडी मिळावी यासाठी त्यांना रांचीतील स्थानिक न्यायालयासमोर उभं केलं जाणार आहे. दरम्यान, पूजा सिंघल यांच्या निवासस्थानाशिवाय त्यांच्या पतीच्या रांचीतील (Ranchi) रुग्णालयातही ईडीनं छापा टाकला होता.