Joshimath : इस्रोने घेतला अहवाल मागे, मोदी सरकारने तज्ज्ञ संस्थांना...

उत्तराखंडमध्ये जमीन खचल्याने स्थानिक लोकांच्या समस्यांमध्ये सातत्याने वाढ होत आहे. याबाबत जोशीमठ दुर्घटनेबाबत भारतीय अंतराळ संशोधन संस्थेने (इस्रो) अहवाल सादर केला होता. या अहवालात इस्रोने चिंता वाढवणारी माहिती दिली होती. जोशीमठमध्ये भूस्खलनाचे प्रमाण झपाट्याने वाढत आहे. (joshimath land subsidence isro pulls down report)

१२ दिवसांत जमीन ५ सें.मी. जोशीमठ भूस्खलनाबाबत फोटोसहीत इस्रोने अहवाल सादर केला होता. दरम्यान केंद्र सरकारने हा अहवाल  वेबसाइटवर हटवण्यास सांगितले. सरकारने तज्ज्ञ संस्थांना माध्यमांशी न बोलण्याचे निर्देश दिले आहेत. 

राष्ट्रीय आपत्ती व्यवस्थापन प्राधिकरणाने (NDMA) सरकारी संस्था आणि वैज्ञानिक संस्थांना उत्तराखंडमधील जोशीमठ येथील भूस्खलनाबाबत मीडियाशी संवाद साधू नये किंवा सोशल मीडियावर डेटा शेअर करू नये, असे निर्देश दिले आहेत.

इस्रो आणि अन्य संस्थांच्या अहवालामुळे केवळ बाधित रहिवाशांमध्येच नाही तर देशातील नागरिकांमध्येही संभ्रम निर्माण होत असल्याचे सरकारने म्हटले आहे. 

भारतीय अंतराळ संशोधन संस्थेच्या नॅशनल रिमोट सेन्सिंग सेंटरने शुक्रवारी जारी केलेल्या प्राथमिक अहवालात जोशीमठच्या काही भागांमध्ये वेगाने भूस्खलन झाल्याचे दिसून आले आहे. इस्रोने उपग्रहातून काढलेली छायाचित्रेही प्रसिद्ध केली होती. दरम्यान हे अहवाल NRSC वेबसाइटवरून काढून टाकण्यात आले आहेत.