न्यायमूर्ती उदय उमेश ललित भारताचे 49वे सरन्यायाधीश म्हणून नियुक्त

नवी दिल्ली - नवी दिल्ली: केंद्र सरकाच्या अधिसूचनेनुसार, न्यायमूर्ती उदय उमेश ललित यांची बुधवारी भारताचे ४९ वे सरन्यायाधीश म्हणून नियुक्ती करण्यात आली आहे. न्यायमूर्ती ललित यांना 27 ऑगस्ट रोजी राष्ट्रपती द्रौपदी मुर्मू मुख्य न्यायाधीश म्हणून शपथ देतील. तसेच ललित 8 नोव्हेंबर रोजी निवृत्त होतील. त्यांचा कार्यकाळ 74 दिवसांचा असेल. (Justice UU Lalit appointed 49th Chief Justice of India)

26 ऑगस्ट रोजी निवृत्त होणारे सरन्यायाधीश एनव्ही रमना यांनी न्यायमूर्ती ललित यांच्या नावाची सरकारकडे शिफारस केली होती. सरन्यायाधीश रमना यांनी न्यायमूर्ती ललित यांची ४९ वे सरन्यायाधीश म्हणून नियुक्ती झाल्याबद्दल अभिनंदन केले आहे.

दरम्यान बार तसेच खंडपीठातील न्यायमूर्ती ललित हे त्यांच्या दीर्घ आणि समृद्ध अनुभवाच्या जोरावर न्यायसंस्थेला अधिक उंचीवर नेतील, असा विश्वासही रमना यांनी व्यक्त केला.

9 नोव्हेंबर 1957 रोजी जन्मलेल्या न्यायमूर्ती यू यू ललित यांनी जून 1983 मध्ये वकील म्हणून नावनोंदणी केली होती. मुंबई उच्च न्यायालयात दोन वर्षे प्रॅक्टिस केल्यानंतर ते जानेवारी 1986 मध्ये दिल्लीला गेले. 2004 मध्ये त्यांना सर्वोच्च न्यायालयाचे वरिष्ठ वकील म्हणून नियुक्त करण्यात आले होते.

न्यायमूर्ती जीएस सिंघवी यांच्या अध्यक्षतेखालील SC खंडपीठाने ललित यांची टूजी स्पेक्ट्रम विक्री घोटाळ्याप्रकरणी विशेष सरकारी वकील म्हणून नियुक्ती केली होती. 13 ऑगस्ट 2014 रोजी त्यांची सर्वोच्च न्यायालयाचे न्यायाधीश म्हणून नियुक्ती करण्यात आली होती.

वरिष्ठ वकील म्हणून, ललित यांनी त्यांचे वडील यूआर ललित यांच्याप्रमाणे फौजदारी कायदा अभ्यासक म्हणून नाव कमावले होते. दोघांनी सर्वोच्च न्यायालयात सराव केला आहे.