Karnataka : भाजपचं टेन्शन वाढवणारी बातमी! माजी मुख्यमंत्री करणार काँग्रेसमध्ये प्रवेश? 'या' युतीला केला विरोध

बंगळूर : आगामी लोकसभा निवडणुकीसाठी (Loksabha Election) भाजप-धजद युतीला (BJP-JDS Alliance) उघडपणे विरोध करणारे भाजप नेते आणि माजी मुख्यमंत्री डी. व्ही. सदानंद गौडा (DV Sadananda Gowda) यांना बुधवारी (ता. २५) हायकमांडने दिल्लीत बोलावले होते. ते पक्ष सोडण्याचा विचार करत असल्याचे समजल्यानंतर हायकमांड खाडकन जागे झाले आहे.

सदानंदगौडा भाजपचे राष्ट्रीय अध्यक्ष जे. पी. नड्डा आणि इतर नेत्यांची भेट घेणार आहेत. पक्षाच्या राज्यातील नेते आणि कार्यकर्त्यांना विश्वासात न घेता धजदसोबत युती करण्यात आली. भाजपमधील ७५ टक्के कार्यकर्त्यांना ही युती पसंत नसल्याबद्दल त्यांनी नुकतीच नाराजी व्यक्त केली होती.

सूत्रांनी दिलेल्या माहितीनुसार, उपमुख्यमंत्री आणि प्रदेश काँग्रेसचे अध्यक्ष डी. के. शिवकुमार यांनी त्यांना लोकसभा निवडणुकीपूर्वी पक्षात प्रवेश करण्याची विनंती केली आहे. माजी मुख्यमंत्री जगदीश शेट्टर यांनीही सदानंद गौडा यांच्याशी संवाद साधला आहे. पक्षसुचनेनुसार मुख्यमंत्रीपदाचा त्याग करणारे सदानंदगौडा यांना पंतप्रधान नरेंद्र मोदी यांच्या पहिल्या मंत्रिमंडळात प्रतिष्ठित रेल्वेखाते मिळाले.

नंतर मंत्रीपद काढून घेतले आणि त्यांना केंद्रीय कायदामंत्री करण्यात आले. नंतर त्यांना केंद्रीय सांख्यिकी आणि कार्यक्रम अंमलबजावणी मंत्री करण्यात आले. जुलै २०२१ मध्ये मंत्रिमंडळ फेरबदलापूर्वी त्यांना पायउतार व्हावे लागले. बंगळूर उत्तर लोकसभा मतदारसंघाचे प्रतिनिधित्व करणारे सदानंद गौडा हे बी. एस. येडियुराप्पा यांच्यानंतर मुख्यमंत्री झाले. सदानंदगौडा यांना मुख्यमंत्रीपद मिळवून देण्यात येडियुराप्पा यांची महत्वाची भूमिका होती.

मात्र, भाजपकडून सदानंदगौडा यांची बंगळूर उत्तर लोकसभा मतदारसंघातून उमेदवारी कापण्याची शक्यता आहे. मंड्या लोकसभेच्या अपक्ष खासदार सुमलता अंबरीश यांना येथून बंगळूर उत्तरमधून उतरविण्याचा भाजप विचार करत आहे. पक्षनेतृत्वाशी चर्चा केल्यानंतर सदानंदगौडा काँग्रेसमध्ये येण्याचा निर्णय घेतील, असे त्यांच्या निकटवर्तीयांनी स्पष्ट केले.