Karnataka Politics : काँग्रेस हायकमांडनं 'हा' विषय घेतला गांभीर्यानं, सुरजेवालांनी थेट आमदार, मंत्र्यांनाच धरलं धारेवर

बंगळूर : काँग्रेस आमदार (Congress MLA) आणि मंत्र्यांची वेगवेगळी वक्तव्ये वाढत असल्याने कॉंग्रेस हायकमांडने हा विषय गांभिर्याने घेतला आहे. पक्षाची चौकट ओलांडल्यास किंवा शिस्तीचे उल्लंघन केल्यास तसे पक्षाच्या अंतर्गत समस्यांवर जाहीर वक्तव्य केल्यास योग्य ती कारवाई केली जाईल, असा इशारा हायकमांडने बुधवारी दिला.

केपीसीसी कार्यालयात आज झालेल्या तातडीच्या बैठकीनंतर बोलताना प्रदेश काँग्रेसचे प्रभारी रणदीप सिंग सुरजेवाला (Randeep Singh Surjewala) म्हणाले की, आमदार आणि मंत्र्यांनी त्यांचे विभाग, मतदारसंघ आणि विकासकामांवर लक्ष केंद्रित केले पाहिजे. पक्षशिस्तीचे उल्लंघन करणारी वक्तव्ये करू नयेत. मंत्री आणि आमदारांनी पक्षाच्या चौकटीबाहेर बोलू नये. मुख्यमंत्री बदलाबाबत ते कोणतेही वक्तव्य करणार नाहीत.’’

आजच्या बैठकीत निगम व महामंडळांच्या नियुक्तीबाबतही चर्चा झाली. मध्यप्रदेश निवडणुकीनंतर आपण यावर पुन्हा चर्चा करू. आगामी लोकसभा निवडणुकीबाबतही चर्चा झाली. कर्नाटकात काँग्रेस २० हून अधिक लोकसभेच्या जागा जिंकेल. मुख्यमंत्री सिद्धरामय्या आणि उपमुख्यमंत्री डी. के. शिवकुमार या दोघांनीही याबाबत आश्वासन दिले आहे. १५ दिवसांत संभाव्य उमेदवारांची यादी तयार करण्याच्या सूचना देण्यात आल्याचे त्यांनी सांगितले.