सत्ताधारी पक्षाचे 38 आमदार भाजपच्या संपर्कात; मिथुनच्या दाव्यानंतर टीएमसीचं प्रत्युत्तर

West Bengal : भाजप नेते (BJP) आणि अभिनेते मिथुन चक्रवर्ती (Mithun Chakraborty) यांनी सत्ताधारी पक्षाचे 38 आमदार पक्षाच्या संपर्कात असल्याचा दावा केल्यानंतर टीएमसीनं मिथुन यांना प्रत्युत्तर दिलंय. टीएमसीचे (TMC) राज्यसभा सदस्य शंतनू सेन यांनी मिथुन मानसिकदृष्ट्या आजारी असल्याचं म्हटलंय.

ते म्हणाले, मी ऐकलं आहे की मिथुन चक्रवर्ती यांना काही दिवसांपूर्वी रुग्णालयात दाखल करण्यात आलं होतं. मला वाटतं की, ते शारीरिक नव्हे तर मानसिकदृष्ट्या आजारी आहेत. त्यांना कोणत्याही प्रकारचं राजकारण कळत नाही, अशी टीका त्यांनी केलीय. त्याच वेळी टीएमसीचे आणखी एक राज्यसभा सदस्य डोला सेन यांनी देखील मिथुन चक्रवर्ती हे प्रसिद्ध अभिनेते आहेत, अशी खिल्ली उडवलीय. 'अभिनेते आणि कलाकारांना स्वप्न कसं पहावं हे माहित आहे. आपण सामान्य लोक आहोत. आपल्याकडं इतकी वैविध्यपूर्ण स्वप्नं नाहीत. मिथुनला त्याच्या सर्व स्वप्नांसाठी शुभेच्छाही दिल्या.'

अभिनेता ते राजकारणी मिथुन चक्रवर्ती यांनी बुधवारी मोठा दावा केला. ते म्हणाले, टीएमसीचे 38 आमदार भाजपच्या संपर्कात आहेत. मी स्वतः 21 आमदारांशी चर्चा करत असल्याचा दावा त्यांनी केलाय. बुधवारी कोलकाता येथील भाजप पक्ष कार्यालयात आयोजित पत्रकार परिषदेत मिथुन यांनी हा दावा केलाय. ते पत्रकारांना म्हणाले की, तुम्हाला ब्रेकिंग न्यूज जाणून घ्यायची आहे का? माझ्याकडं टीएमसीचे 38 आमदार आमच्या संपर्कात असल्याची ब्रेकिंग न्यूज आहे. भाजपला मुस्लिमविरोधी म्हणणं हे एक षडयंत्र असल्याचंही ते म्हणाले.