Loksabha Election Result : ममतांच्या बालेकिल्ल्यात भाजपची आघाडी

कोलकता - लोकसभा निवडणुकीत पश्‍चिम बंगालमध्ये भाजपची हार झाली असली तरी मुख्‍यमंत्री ममता बॅनर्जी यांच्या भवानीपुरा विधानसभा मतदारसंघात भाजपने चांगली कामगिरी केली आहे. या मतदारसंघात तृणमूल काँग्रेस पक्षाच्या उमेदवाराला भाजपच्या उमेदवारापेक्षा केवळ आठ हजार २९७ मते जास्त पडली आहेत.

दक्षिण कोलकता लोकसभा मतदारसंघात भवानीपूरचा समावेश होतो. ममता बॅनर्जी येथील आमदार आहेत. निवडणूक आयोगाने दिलेल्या माहितीनुसार या विधानसभा मतदारसंघातील २६९ बूथपैकी १४९ ठिकाणी भाजपला जास्त मते पडली आहेत. तसेच कोलकता महानगरपालिकेच्या आठपैकी पाच वॉर्डांमध्ये भाजपच्या मतांचे प्रमाण चांगले आहे. भवानीपूरमध्ये भाजपने मतांमधील अंतर ५० हजारांनी कमी केले आहे.

सप्टेंबर २०२१ मध्ये झालेल्या पोटनिवडणुकीत ममता बॅनर्जी यांनी भवानीपूर विधानसभेची जागा सुमारे ५८ हजार ८३२ मतांच्या फरकाने जिंकली होती. त्यांना ७२ टक्के मते मिळविली. भाजपचे नेते सुवेंदू अधिकारी यांच्याकडून नंदीग्रामची मतदारसंघातून पराभूत व्हावे लागल्याने बॅनर्जी यांना पोटनिवडणूक लढवावी लागली होती.