नोटबंदीनंतरची प्राप्तिकर विभागाची मोठी कारवाई, कोट्यवधींची रोकड जप्त

नवी दिल्ली- प्राप्तिकर विभागाने बनावट बिलिंग करणाऱ्या एका टोळीच्या दिल्ली एनसीआर, हरियाणा, पंजाब, उत्तराखंड आणि गोव्यातील सुमारे 42 ठिकाणी छापे टाकून 500 कोटींच्या बिलिंगचा भंडाफोड केला आहे. 'एएनआय'ने सूत्रांच्या हवाल्याने दिलेल्या वृत्तानुसार, छाप्यादरम्यान एंट्री ऑपरेटर संजय जैन आणि त्याच्या लाभार्थ्यांकडून 62 कोटी रुपयांची रोकड जप्त करण्यात आली आहे. नोटबंदीनंतर दिल्ली एनसीआरमधील रोकड जप्त करण्याची ही सर्वात मोठी कारवाई आहे.  

प्राप्तिकर विभागाने दिल्ली-एनसीआरसह पंजाब, हरियाणा, उत्तराखंड आणि गोव्यातील 42 ठिकाणी छापे मारले आहेत. 

प्राप्तिकर विभागाने जारी केलेल्या निवेदनानुसार, काही जण हे नेटवर्क चालवत होते. मंगळवारी मारलेल्या छाप्यात 2.37 कोटी रुपयांची रोकड आणि 2.89 कोटी रुपयांचे दागिने जप्त करण्यात आले होते. त्याचबरोबर 17 लॉकरही सापडले असून ते अजून उघडायचे आहेत.  

हेही वाचा- टेरर फंडिंगः काश्मीरमध्ये वृत्तपत्र, NGO च्या कार्यालयांवर एनआयएचे छापे

छापेमारी दरम्यान या नेटवर्कचे संपूर्ण जाळे उघडकीस आले असून अनेक कंपन्याही त्यांच्या बनावट बिलिंगचे लाभार्थी आहेत. यादरम्यान काही असे दस्तऐवज आहेत, ज्यामुळे हॉटेलमध्ये राहण्याची 500 कोटी रुपयांची नोंद आहे.