'मोदींच्या नेतृत्वात पाकिस्तानात घुसून दहशतवाद्यांचा खात्मा'

नवी दिल्ली : गृहमंत्री अमित शहा (Amit Shah) यांनी एका कार्यक्रमात पंतप्रधान नरेंद्र मोदींच्या (Narendra Modi) नेतृत्वाचं कौतुक केलंय. कोरोना महामारी (Coronavirus), दहशतवाद, नक्षलवाद आणि जम्मू-काश्मीर (Jammu and Kashmir) अशा विविध मुद्द्यांवर पंतप्रधान मोदींच्या नेतृत्वात भाजप सरकारनं केलेली कामगिरी नक्कीच कौतुकास्पद आहे, असं त्यांनी म्हंटलंय.

ते पुढे म्हणाले, 2014 पूर्वी भारतात वेगळी परिस्थिती होती. मात्र, ती आता सुधारलीय. पंतप्रधान मोदींच्या नेतृत्वाखाली कोविड महामारीच्या काळात महत्वपूर्ण निर्णय घेण्यात आले, त्यामुळं भारताची अर्थव्यवस्था सध्या इतर कोणत्याही देशाच्या अर्थव्यवस्थेपेक्षा वेगाने वाढतेय. एका वृत्त वाहिनीच्या कार्यक्रमात अमित शहा पुढे म्हणाले, आपल्या देशाचे पंतप्रधान नरेंद्र मोदी यांच्या नेतृत्वाखाली सैन्यानं पाकिस्तानच्या घरात घुसून दहशतवादी हल्लेखोरांना चोख प्रत्युत्तर दिलंय. काश्मीरचा विकास खुंटला होता, त्यामुळं कलम 370 ही पंतप्रधानांनी 5 ऑगस्ट 2019 रोजी हटवलं. आता काश्मीरमध्ये शांतता आहे. विकासही जोमानं होत आहे.

पंतप्रधान मोदींनी आधी गुजरातचं नेतृत्व केलं आणि आता ते संपूर्ण देशाचं नेतृत्व करत आहेत, याचा आम्हाला अभिमान आहे. पंतप्रधान मोदींच्या आगमनानंतर जनतेला विकासाशी जोडण्याचं काम सुरू झालंय. कोरोना महामारीनं संपूर्ण जगात अनेक बदल घडवून आणले. भारतातही बरेच बदल पहायला मिळाले. देशाला आता स्थिर सरकार मिळालंय, ही आपल्यासाठी भाग्याची गोष्ट आहे. यापूर्वीही देशात मंत्रिमंडळ होतं. मात्र, मोदींसारखं नेतृत्व कोणीच केलं नाही. देशात भ्रष्टाचार वाढला होता, देशाची बदनामी झाली होती. पण, 2014 मध्ये भारताला एक स्थिर सरकार मिळालंय, असंही त्यांनी सांगितलं.