Naxalite Attack On CRPF Camp : सीआरपीएफ कॅम्पवर नक्षलवाद्यांचा हल्ला! तीन जवान शहीद, तर १४ जण जखमी

Naxalite Attack On CRPF Camp Latest News : छत्तीसगडमधील विजापूर येथे मोठा नक्षलवादी हल्ला झाला आहे. नक्षलवाद्यांनी सीआरपीएफच्या कॅम्पवर झालेल्या या हल्ल्यात तीन जवान शहीद झाले आहेत. तर या हल्ल्यात 14 जवान जखमी झाले आहेत. मिळालेल्या माहितीनुसार, सुकमा-विजापूर जिल्ह्यातील सीमावर्ती भागातील टेकलगुडेम गावात असलेल्या सीआरपीएफ कॅम्पवर हा हल्ला झाला.

अधिकाऱ्यांनी दिलेल्या माहितीनुसार, जखमी जवानांना रुग्णालयात दाखल करण्यात आले आहे. हल्ल्याची माहिती मिळताच मोठ्या संख्येने जवान घटनास्थळी दाखल झाले असून संपूर्ण परिसराला घेराव घालण्यात आला आहे. या परिसरात शोधमोहीम सुरू करण्यात आली आहे, अशी माहिती अधिकाऱ्यांनी दिली.

मिळालेल्या माहितीनुसार, सुकमा येथील जगरगुंडा भागात आजच सुरक्षा कॅम्प उभारण्यात आला होता. यानंतर सीआरपीएफचे कोब्रा जवान सर्च ऑपरेशन राबवत होत. दरम्यान, नक्षलवाद्यांनी त्यांच्यावर हल्ला केला, त्यानंतर सीआरपीएफच्या जवानांनीही प्रत्युत्तर दिले. या चकमकीत सीआरपीएफचे 3 जवान शहीद झाल्याची माहिती अधिकाऱ्यांनी दिली. तर 14 जखमी जवानांना एअरलिफ्ट केले जाऊ शकते.