NCERTकडून 12वीच्या पुस्तकात बदल! बाबरी विध्वंसचा उल्लेख हटविला तर राम मंदिर निर्मिती प्रकरण जोडले

नवी दिल्ली : राष्ट्रीय शिक्षण संशोधन आणि प्रशिक्षण परिषदेने (एनसीईआरटी) बारावीच्या राजकीय विज्ञान (Political Science) पुस्तकातील काही संदर्भामध्ये बदल केले आहेत. बाबरी मशिदीचा विध्वंस हा उल्लेख हटविण्यात आला आहे तर राम मंदिराची निर्मिती हे प्रकरण जोडण्यात आले आहे. पुस्तकातील संवेदनशील संदर्भ बदलण्यात आले असल्याचे एनसीईआरटीचे म्हणणे आहे.

हिंदुत्वाचे राजकारण, गुजरात दंगल आणि अल्पसंख्यांकाशी संबंधित संदर्भही पुस्तकातून वगळण्यात आले आहेत. नव्या शैक्षणिक वर्षापासून संदर्भ बदलांसह पुस्तक विद्यार्थ्यांना उपलब्ध करुन दिले जाणार आहे. सीबीएसई माध्यमाच्या देशभरातील 30 हजार शाळांमध्ये एनसीईआरटीची पुस्तके वापरली जातात.

बारावीच्या राजकीय विज्ञानाच्या पुस्तकातील आठव्या धड्यात बाबरी विध्वंसचा उल्लेख आहे. हा उल्लेख हटवण्यात आला असून या जागी राम मंदिर आंदोलनाचा इतिहास, हा उल्लेख करण्यात आला आहे. याच धड्यातील हिंदुत्वाचे राजकारण हा उल्लेख वगळण्यात आला आहे. देशाच्या राजकारणात मागील काही वर्षांत महत्वाचे बदल झाले आहेत. त्यामुळे अभ्यासक्रमात सुधारणा करण्यात आली असल्याचे 'एनसीईआरटी' कडून या बदलांवर सांगण्यात आले आहे. पुस्तकातील पाचव्या धड्यात गुजरात दंगलीचा तसेच काही ठिकाणी 'मुस्लिम समाज' असा उल्लेख आहे. हा उल्लेखही वगळण्यात आला आहे.