राष्ट्रपती निवडणूक: राष्ट्रवादी, काँग्रेसच्या आमदारांनी द्रौपदी मुर्मूंना केलं मतदान!

नवी दिल्ली : राष्ट्रपतीपदासाठी आज निवडणूक पार पडत आहे. दरम्यान, राष्ट्रवादी आणि काँग्रेसनं विरोधीपक्षाचे उमेदवार यशवंत सिन्हा यांना समर्थक दिलेलं आहे. पण या दोन्ही पक्षांच्या प्रत्येकी एका आमदारानं आपण भाजपप्रणित एनडीएचे उमेदवार द्रौपदी मुर्मू यांना मतदान केलं आहे. यामुळं या निवडणुकीत क्रॉस वोटिंग झाल्याचं स्पष्ट झालं आहे. (NCP MLA Kandhal Jadeja has voted for NDAs presidential candidate Droupadi Murmu)

राष्ट्रवादी काँग्रेसचे गुजरातचे आमदार कंधल एस. जडेजा आणि ओडिशातील काँग्रेसचे आमदार मोहम्मद मुकीन यांनी एनडीचे उमेदवार द्रौपदी मुर्मू यांना मत दिल्याचं स्वतः सांगितलं आहे. दरम्यान, सध्या एनडीचा भाग नसलेल्या विरोधीपक्षातील शिवसेना, बिजू जनता दल, वायएसआर काँग्रेस आणि तेलगू देसम पार्टी (टीडीपी) आदींनी एनडीएच्या मुर्मू यांना पाठिंबा जाहीर केला होता. पण काँग्रेस आणि राष्ट्रवादीच्या आमदारांनीही दुसऱ्या उमेदवाराला मत दिल्यानं क्रॉस वोटिंग झाल्याचं स्पष्ट झालं आहे.

दरम्यान, राष्ट्रपतीपदासाठी विरोधकांमध्ये सुरुवातीपासूनच बराच खल सुरु होता. पहिल्यांदा सर्वांनी राज्यातील ज्येष्ठ नेते शरद पवार यांना राष्ट्रपतीपदासाठी पसंती दिली होती. परंतू या प्रस्तावाला पवारांनी नम्रपणे नकार देत आपल्याला अजूनही सक्रीय राजकारण करायचं असल्यानं आपण उमेदवारी स्विकारु शकत नाही असं त्यांनी म्हटलं होतं. त्यानंतर राष्ट्रपतीपदासाठी ममता बॅनर्जी यांनी विरोधकांकडून जम्मू-काश्मीरचे माजी मुख्यमंत्री आणि नॅशनल कॉन्फरन्सचे प्रमुख फारुख अब्दुल्ला यांच्या नावाचा प्रस्ताव मांडला होता. पण त्यांनीही सध्या जम्मू-काश्मीरला आपली गरज असल्याचं सांगत उमेदवारी स्विकारायला नकार दिला होता. त्यानंतर अखेर पूर्वश्रमीचे भाजपचे खासदार आणि मोदींवर टीका करत पक्षातून बाहेर पडलेले यशवंत सिन्हा यांच्या नवावर विरोधकांचे राष्ट्रपतीपदाचे उमेदवार म्हणून शिक्कामोर्तब करण्यात आलं.