NEET 2024 : नीट परीक्षेसंदर्भातील 38 याचिकांवर सर्वोच्च न्यायालयात उद्या एकत्रित सुनावणी

नवी दिल्ली, ता. ७ ः ‘नीट’ परीक्षेतील अनियमितता आणि पेपरफुटीच्या संदर्भात दाखल असलेल्या ३८ याचिकांवर सर्वोच्च न्यायालयात सोमवारी एकत्रितपणे सुनावणी होणार आहे. सरन्यायाधीश धनंजय चंद्रचूड यांच्या खंडपीठासमोर ही सुनावणी होईल. पाच मे रोजी झालेल्या नीट परीक्षेत अनियमितता झाल्याचा आक्षेप असंख्य विद्यार्थ्यांबरोबरच विरोधी पक्षांनी घेतला होता. ही परीक्षा रद्द करून नव्याने परीक्षा घेण्याची विनंती काही याचिकांमध्ये करण्यात आली आहे. तर  विद्यार्थ्यांचे व्यापक हित लक्षात घेऊन परीक्षा रद्द केली जाऊ नये, असेही काही याचिकांमध्ये नमूद करण्यात आले आहे.

सरन्यायाधीशांच्या खंडपीठासमोर या याचिकांची सुनावणी होत असल्याच्या पार्श्वभूमीवर केंद्र सरकारनेही शुक्रवारी एक प्रतिज्ञापत्र दाखल केले आहे, ‘‘संपूर्ण नीट परीक्षा रद्द करणे तर्कसंगत ठरणार नाही,’’ असे म्हणणे मांडले आहे. 

‘नीट’ परीक्षेचे आयोजन करणाऱ्या नॅशनल टेस्टिंग एजन्सीने देखील न्यायालयात प्रतिज्ञापत्र दाखल करत आपले म्हणणे मांडले आहे. ‘एमबीबीएस’, ‘बीडीएस’ तसेच आयुष अभ्यासक्रमांसाठीचे प्रवेश हे राष्ट्रीय पात्रता व प्रवेश परीक्षेच्या (नीट) माध्यमातून दिले जातात. नीट परीक्षेतील अनियमितता चव्हाट्यावर आल्यानंतर सरकारने या प्रकरणाच्या सीबीआय चौकशीचे आदेश दिले होते. त्यानुसार सीबीआयने विविध राज्यांत कारवाई करत काही आरोपींना अटक केली आहे.