जम्मूतील सुंजवानमध्ये चकमक; एका जवानाला वीरमरण, ४ जखमी

नवी दिल्ली : जम्मू-काश्मीरमधील जलालाबाद सुंजवान (Jammu Sunjwan Encounter) भागात शुक्रवारी पहाटे दहशतवादी आणि सुरक्षा दलांमध्ये चकमक झाली. यामध्ये सुरक्षा दलाच्या एका जवानाला वीमरण आले असून इतर चार जण जखमी आहे. चकमक अजूनही सुरूच आहे.

जलालाबाद सुंजवान भागात काही दहशतवादी लपून बसल्याची माहिती मिळाली. त्यानंतर सुरक्षा दलाच्या जवानांनी या भागाला वेढा घातला. मध्यरात्री सुरू झालेली ही चकमक शुक्रवारी सकाळपर्यंत सुरूच आहे. यामध्ये सीआयएसएफचे एएसआय एसपी पटेल यांना वीरमरण आले. तसेच चार जवान जखमी झाले आहेत, असं जम्मूचे एडीजीपी मुकेश सिंग यांनी सांगितलं. तसेच जैश-ए-मोहम्मद (JeM) चे तब्बल दोन दहशतवादी जाळ्यात सापडले आहेत. जम्मू-काश्मीर पोलिस आणि सीआरपीएफने ही संयुक्त कारवाई केली आहे.

सुरक्षा दल आणि दहशतवाद्यांमध्ये झालेल्या चकमकीत कठुआचे पोलिस हेड कॉन्स्टेबल बलराज सिंह, अखनूरचे एसपीओ साहिल शर्मा, ओडिशाचे सीआयएसएफचे परमोद पात्रा आणि आसामचे अमीर सोरण हे जखमी झाले आहेत. दरम्यान, या चकमकीमुळे जम्मूच्या काही भागात मोबाईल आणि इंटरनेट सेवा बंद करण्यात आली आहे.