Monsoon Session : माफी मागितल्याशिवाय निलंबन मागे नाही तर महागाईवर...

नवी दिल्ली : विरोधी पक्षनेत्यांनी सदस्यांचे निलंबन मागे घेण्याची मागणी केली आहे. गदारोळ व घोषणाबाजीमुळे आतापर्यंत संसदेच्या दोन्ही सभागृहातून २४ खासदारांना निलंबित करण्यात आले आहे. सदस्यांनी माफी मागितल्याशिवाय निलंबन मागे घेणार नसल्याचे राज्यसभेचे सभापती व्यंकय्या नायडू (Venkaiah Naidu) यांनी स्पष्ट केले. तसेच महागाईच्या मुद्द्यावर पुढील आठवड्याच्या सुरुवातीला राज्यसभेत चर्चा होऊ शकते, असे सूत्रांनी बुधवारी सांगितले. (Parliament Monsoon Session News)

मिळालेल्या माहितीनुसार, राज्यसभेतील १९ खासदारांचे निलंबन व दरवाढीच्या मुद्द्यावरून बुधवारी विरोधीपक्षांच्या १० नेत्यांनी राज्यसभेचे (Rajya Sabha) अध्यक्ष व्यंकय्या नायडू (Venkaiah Naidu) यांची भेट घेतली. निलंबित सदस्यांची संख्या खूप जास्त आहे. सदस्यांची सभागृहात उपस्थिती राहावी यासाठी निलंबन मागे घेतले जाऊ शकते, अशी सूचना नेत्यांनी केली. दरवाढीच्या मुद्द्यावर चर्चेसाठी ठरावीक तारीख निश्चित केली जाऊ शकते, असेही नेत्यांनी सांगितले. सदस्यांचे निलंबन कोणत्याही अटी न ठेवता मागे घ्यावे, असे काही नेत्यांचे मत होते.

संसदीय कामकाज मंत्री प्रल्हाद जोशी, सभागृह नेते पीयूष गोयल आणि संसदीय कामकाज राज्यमंत्री मुरलीधरन यांनीही बैठकीत भाग घेतला. दरवाढीच्या मुद्द्यावर सरकार चर्चा करण्यास तयार असल्याचे मंत्र्यांनी सांगितले. अर्थमंत्री निर्मला सीतारामन कोरोनातून बरे होताच सरकारने या विषयावर चर्चा करण्याचा मानस व्यक्त केला आहे.

संसदेच्या दोन्ही सभागृहात कोणत्याही दिवशी दरवाढीवर चर्चा होऊ शकते. लोकसभा अध्यक्षांशी चर्चा करून चर्चेचे वेळापत्रक निश्चित केले जाईल, असेही ते म्हणाले. सभापतींनी विरोधी पक्षनेते आणि संबंधित मंत्र्यांशी केलेल्या चर्चेनंतर यावर व्यापक एकमत झाले आहे.

अध्यक्ष व्यंकय्या नायडू यांची भेट घेणाऱ्या नेत्यांमध्ये काँग्रेसचे मल्लिकाजुर्न खर्गे आणि केसी वेणुगोपाल, सपाचे राम गोपाल यादव, टीएमसीचे डेरेक ओब्रायन, द्रमुकचे तिरुची सिवा, शिवसेनेचे संजय राऊत, सीपीएमचे इलामाराम करीम, सीपीआयचे बिनोय रेड्मो आणि एमएमकेचे बिनय रेड्को विसवा उपस्थित होते.