पावसाळी अधिवेशनापूर्वी 18 जुलैला सर्वपक्षीय बैठक

नवी दिल्ली- केंद्रीय संसदीय कामकाज मंत्री प्रल्हाद जोशी यांनी 18 जुलै रोजी सर्वपक्षीय बैठक बोलावली आहे. पावसाळी अधिवेशन सुरु होण्याच्या एकदिवस आधी ही बैठक होत आहे. सकाळी अकरा वाजता ही बैठक पार पडेल. भारतीय जनता पक्षाची कार्यकारी बैठक याच दिवशी होण्याची शक्यता आहे. एएनआयने यासंदर्भातील वृत्त दिलं आहे. पावसाळी अधिवेशनाला 19 जुलैपासून सुरुवात होत आहे. कोरोना महामारीच्या दुसऱ्या लाटेनंतरचे हे पहिले अधिवेशन होत आहे. पावसाळी अधिवेशन 19 दिवस चालणार असून ते 13 ऑगस्टला संपेल.

मिळालेल्या माहितीनुसार, जवळपास एका महिन्यापर्यंत चालणाऱ्या या मॉन्सून सत्रादरम्यान 20 बैठका होण्याची शक्यता आहेत. सामान्यत: संसदेचं पावसाळी अधिवेशन जुलैच्या तिसऱ्या आठवड्यात सुरु होतं आणि स्वातंत्र्यदिनाच्या आधी समाप्त होतं. सूत्रांनी सांगितलंय की, संसदीय कार्यविषयक कॅबिनेट समितीने या अधिवेशनाच्या कार्यकाळासंदर्भात शिफारस केली आहे. त्यांनी म्हटलंय की, सत्राच्या दरम्यान संसद परिसरात कोरोनाशी निगडीत सर्व प्रकारच्या प्रोटोकॉलचं पालन केलं जाईल. या अधिवेशनाच्या दरम्यान संसद परिसरात प्रवेश करणाऱ्यांनी कोरोना लशीचा कमीतकमी एक डोस घेतलेला असणे अनिवार्य असणार आहे.