गुजरात सरकारने आणले पेंग्विन; आता bjp काय बोलणार? - महापौर पेडणेकर

महाराष्ट्रात मुंबई महानगरपालिकेने (BMC) आणलेले पेंग्विन (Penguin) हा मोठा चर्चेचा विषय ठरला होता. पेंग्विनला लागणाऱ्या खर्चावरून सरकारवर मोठ्या प्रमाणात टीका झाली होती. विषेशत: आदित्य ठाकरे यांना तेव्हा याचा मोठा विरोध सहन करावा लागला होता. त्यातच आता पुन्हा एकदा पेंग्विन चर्चेत आले आहेत. कारण आता गुजरात (Gujrat) सरकारने देखील पेंग्विन आणले आहेत.

गुजरात सरकारने नुकतेच आफ्रिकन पेंग्विन विकत घेतले आहेत. हे पेंग्विन गुजरातमधील सायन्स सिटीत एक पेंग्विन कक्ष उभारून त्यात ठेवण्यात आले आहेत. या कक्षाचं उद्घाटन गुजरात सरकारच्या शिक्षण मंत्र्यांच्या हस्ते करण्यात आलं आहे. विशेष म्हणजे गुजरात सरकारने मुंबई महानगरपालिकेच्या पेंग्विन डॉक्टरांना गुजरात प्रकल्पात मदत करण्यास विनंती केलीय. त्यामुळे आता शिवसेना चांगलीच आक्रमक झालीय. आता मुंबई भाजपचे नेते यावर काय प्रतिक्रिया देणार, हे त्यांना मान्य आहे का ?असा प्रश्न मुंबई महानगरपालिकेच्या महापौर किशोरी पेडणेकर (Kishori pednekar) यांनी केलाय. गुजरातच्या या पेंग्विनवरून भाजपला येणाऱ्या काळात टीकेचा सामना करावा लागू शकतो असं दिसून येतंय.

दरम्यान, गुजरातमधील हे पेंग्विन चेंबर मुंबईपेक्षा लहान असून, त्यांचा दैनंदिन खर्च 2.5 लाखांहून अधिक आहे. मुंबईच्या पेंग्विनला सांभाळण्यासाठी वर्षभरात तब्बल १२ कोटींचा खर्च येतो.