सुटीवर असलेले राहुल गांधी थेट लोकसभेत

नवी दिल्ली : संसदेचे पावसाळी अधिवेशन आजपासून (सोमवार) सुरु झाले असताना काँग्रेस अध्यक्ष राहुल गांधी पहिल्याच दिवशी गैरहजर असल्याने चर्चांना उधाण आले. मात्र, राहुल गांधी यांनी अध्यक्षपदाचा राजीनामा अद्याप मागे घेतला नसल्याची माहिती मिळत असून सुटीवर परतलेले राहुल गांधी यांनी थेट लोकसभेत हजेरी लावत शपथ घेतली.

लोकसभेच्‍या नवनिर्वाचित सदस्यांचा शपथविधीच्या पहिल्या दिवशी राहुल गांधी यांनी संसदेत येण्यास उशीर केला. यावरून राहुल गांधी अनुपस्थित असल्याच्या चर्चाना वेग आला.

दरम्यान, राहुल गांधी यांना अमेठीतून पराभव स्वीकारावा लागला होता. स्मृती इराणी यांनी राहुल यांचा पराभव केला होता. आज संसदेत स्मृती इराणी या शपथविधीला आल्या असताना त्यांचे बाक वाजवून स्वागत करण्यात आले. राहुल गांधी हे वायनाड मधून निवडून आले आहेत.

अधिवेशनाचे पहिले दोन दिवस नवनिर्वाचित खासदारांना शपथ दिली जाणार आहे. 19 जून रोजी लोकसभा अध्यक्षांची निवड करण्यात येईल. दुसऱ्या दिवशी राष्ट्रपती रामनाथ कोविंद संसदेच्या दोन्ही सभागृहातील सदस्यांना संबोधित करतील. 26 जुलै रोजी लोकसभा अधिवेशनाची सांगता होणार आहे.