Jammu Kashmir : जवानांमध्ये वादातून गोळीबार; दोन ठार, तर दोघे जखमी

पूंछ : पूंछ जिल्ह्यातील (Poonch District) सुरनकोटमधून एक मोठी घटना समोर आलीय. सुरनकोटमध्ये सीमेची सुरक्षा सांभाळणाऱ्या लष्कराच्या (Indian Army) बटालियनमध्ये तैनात असलेल्या जवानांमध्ये वाद झाला, त्यानंतर गोळीबारही झालाय. या घटनेत लष्कराचे दोन जवान शहीद झाले, तर दोन जण जखमी झाले. जखमींना जवळच्या रुग्णालयात दाखल करण्यात आलंय.

सुरनकोट पोलिसांनीही (Surankote Police) याला दुजोरा दिला असून, या वादामागील कारण अद्याप समजू शकलं नसल्याचं त्यांनी सांगितलं. पोलिसांचं पथक घटनास्थळी रवाना झालं आहे. पहाटे साडेपाचच्या सुमारास हा प्रकार घडल्याचं सूत्रांनी सांगितलं. टेरिटोरियल बटालियनच्या या जवानांची सकाळी सहा वाजता परेड होणार होती, असंही सांगण्यात येतंय. त्याआधी सैनिकांमध्ये काही गोष्टीवरून वाद झाला होता. प्रकरण इतकं वाढलं की सैनिकांमध्ये हाणामारी झाली.

दरम्यान, परेडसाठी देण्यात आलेल्या शस्त्रांचा वापर करून काही जवानांनी एकमेकांवर गोळीबार सुरू केला. यामध्ये दोन जवानांचा जागीच मृत्यू झाला तर दोन जवान गंभीर जखमी झाले. गोळीबाराचा आवाज ऐकून बटालियनमध्ये घबराटीचं वातावरण पसरलं. दरम्यान, काही सैनिक रक्ताने माखलेले जमिनीवर पडले होते. या सर्वांना तातडीनं जवळच्या रुग्णालयात दाखल करण्यात आलं. तिथं डॉक्टरांनी दोघांना मृत घोषित केलं, तर दोन्ही जखमींवर उपचार सुरू आहेत. घटनेची माहिती मिळताच पोलिसांचा ताफाही तिथं पोहोचला आहे. सैनिकांमध्ये वाद कशामुळं सुरू झाला हे समजू शकलेलं नाही.