AAP Vs BJP: भाजपच्या फिल्मी पोस्टरबाजीनंतर आपचं जोरदार प्रत्युत्तर; पाहा काय आहे प्रकार?

नवी दिल्ली : दिल्लीच्या महापालिकेत झालेल्या राड्यावरुन भाजपनं एक पोस्टर तयार केलं होतं त्याला आता आपनं भाजप नेत्यांचं पोस्टर बनवून उत्तर दिलं आहे. आपनं तयार केलेल्या पोस्टरमध्ये खासदार आणि क्रिकेटर गौतम गंभीर, दिल्ली भाजपचे अध्यक्ष मनोज तिवारी यांचे फोटो असून त्यावर 'बॅलट चोर मचाए शोर' असं टायटल दिलं आहे.

काही तासांपूर्वी भाजपनं एक पोस्टर रिलिज केलं होतं. यामध्ये आम आदमी पार्टीवर टीका करण्यात आली होती. यामध्ये आपच्या नेत्या आतिशी या दिल्ली महापालिकेत ऑर्केस्ट्रा करत असल्याचं दाखवण्यात आलं होतं. त्यानंतर आपनं देखील भाजपला प्रत्युत्तर देताना एक पोस्टर रिलिज केलं.

यामध्ये खासदार आणि क्रिकेटर गौतम गंभीर, दिल्ली भाजपचे अध्यक्ष खासदार मनोज तिवारी, नगरसेवक आणि महापौरपदाचे उमेदवार रेखा गुप्ता, चंदनकुमार चौधरी आणि भाजप प्रवक्ते हरिष खुराणा यांचे फोटो असून त्यावर 'बॅलट चोर मचाए शोर' असं टायटल दिलं आहे. तसंच या पोस्टरला 'लोकशाहीचे हत्यारे आणि मतपत्रिका चोर' असं कॅप्शन दिलं आहे.

भाजपनं जे पोस्टर तयार केलं यामध्ये आपचे आमदार अतिषी आणि दुर्गेश पाठक तसेच दिल्लीच्या महापौर शेल्ली ओबेरॉय यांचे फोटो आहेत. भाजपनं हे पोस्टर रिलिज करताना याला कॅप्शन दिलं की, आपच्या खलनायिका महापालिकेत हिंसा आणि हुकुमशाहीचा ऑर्केस्ट्रा करत आहे.

दरम्यान, दिल्लीच्या महापालिकेत महापौर निवडणुकीदरम्यान भाजप आणि आपच्या नगरसेवकांमध्ये मोठा राडा झाला होता. एकमेकांना पकडून तुफान हाणामारी घडली होती.