राहुल गांधींच्या ट्रॅक्टरला पोलिसांचा 'ब्रेक', नेत्यांनाही घेतलं ताब्यात

शेतकरी आंदोलनाच्या समर्थनार्थ राहुल गांधी यांनी स्वत: ट्रॅक्टर चालवत संसदेत पोहचले. तीन कृषी कायदे रद्द करण्याच्या मागणीसाठी दिल्लीच्या सीमांवर तळ ठोकून बसलेल्या शेतकऱ्यांच्या समर्थनार्थ राहुल गांधी यांनी आज ट्रक्टरवर स्वार होत मोदी सरकारचा विरोध केला. पण राहुल गांधी संसदेत पोहचल्यानंतर दिल्ली पोलिसांनी (Delhi Police) ट्रॅक्टरसह काँग्रेस नेत्यांनाही ताब्यात घेतलं. या सर्व घटनेमुळे सोशल मीडियावर काँग्रेस समर्थक नेटकऱ्यांनी दिल्ली पोलीस आणि मोदी सरकारच्या धोरणावर कडाडून टीका केली.

सध्या संसदेचं मान्सून सत्र सुरु असल्यामुळं परिसरात कलम 144 लागू आहे. असं असतानाही राहुल गांधी काँग्रेस नेत्यासह ट्रक्टरवर स्वार होत संसदेत पोहचले. राहुल गांधी संसदेत पोहचले मात्र, नियमांचं उल्लघंन केल्याप्रकरण पोलिसांनी रणदीप सुरजेवाला आणि श्रीनिवास बी.वी या नेत्यांसह ट्रक्ट्रर आणि कार्यकर्त्यांना ताब्यात घेतलं.

संसदेत दाखल होण्यापूर्वी राहुल गांधी यांनी प्रसारमाध्यमांसोबत संवाद साधला. यावेळी राहुल गांधी यांनी मोदींच्या धोरणार टीका केली. ते म्हणाले, "आम्ही शेतकऱ्यांचा संदेश घेऊन संसदेत आलो आहोत. शेतकऱ्यांचा आवाज दाबला जात आहे. सरकारला शेती कायदे मागे घ्यावेच लागतील. हे कायदे 2-3 बड्या उद्योगपतींसाठी आहेत. शेतकऱ्यांच्या फायद्यासाठी नाहीत, नफ्यासाठी नाहीत. हे काळे कायदे आहेत."