राफेलवर ‘ॐ’ नाही तर काय लिहायचे? - राजनाथ

भिवानी (हरियाना) - ‘राफेल’ या लढाऊ विमानांच्या पूजेवरून विरोधकांच्या टीकेचे लक्ष्य बनलेले संरक्षणमंत्री राजनाथसिंह यांनी आज काँग्रेस नेते राहुल गांधी यांच्यावर प्रतिहल्ला चढविला. या लढाऊ विमानाच्या दर्शनी भागामध्ये राजनाथ यांनी ‘ओम’ हा शब्द लिहिल्याने विरोधक संतापले होते. यावर राजनाथ यांनीच तेथे ‘ओम’ हा शब्द नाही तर अन्य काय लिहायला हवे होते, असा प्रतिसवाल राहुल यांना सभेत केला.

राजनाथ म्हणाले, ‘विजयादशमीच्या दिवशी शस्त्रपूजन करणे ही आपली परंपरा असून, मी राफेल विमानावर ओम हा शब्द लिहिला तेव्हा काही लोकांनी मी हाच शब्द का लिहिला म्हणून आक्षेप घेतला. मी राहुल यांना विचारू इच्छितो की तेथे ‘ओम’ नाही तर अन्य कोणता शब्द लिहायला हवा होता?’’ काश्‍मीरच्या मुद्द्यावरूनदेखील राजनाथ यांनी काँग्रेसवर टीका केली. काँग्रेसने काश्‍मीरची समस्या आंतरराष्ट्रीय पातळीवर नेली. प्रत्यक्षात हा मुद्दा भारताचा अंतर्गत प्रश्‍न आहे. काश्‍मीरमध्ये दहशतवादी हल्ले करत असताना मानवी अधिकारांचे उल्लंघन होत नाही का, तेव्हा काँग्रेसचे नेते चकार शब्ददेखील का काढत नाही, असेही त्यांनी विचारले.