शेतकरी आंदोलन: ममता बॅनर्जींना भेटणार राकेश टिकैत; काय असेल पुढची दिशा?

कोलकाता : भारतीय किसान युनियनचे नेते राकेश टिकैत हे आज पश्चिम बंगालच्या मुख्यमंत्री ममता बॅनर्जी यांना कोलकाता येथे जाऊन भेटणार आहेत. सुत्रांनी दिलेल्या माहितीनुसार, दोन्ही नेते केंद्राच्या कृषी कायद्यांच्या विरोधातील शेतकरी आंदोलनाची धार अधिक वाढवण्यासाठी तसेच सरकारला घेरण्यासाठीच्या रणनीतीबाबत चर्चा करतील. या भेटीआधी शेतकरी नेता राकेश टिकैत यांनी माध्यमांशी बोलताना म्हटलंय की, आज दुपारी तीन वाजता ते मुख्यमंत्री ममता बॅनर्जी यांची भेट घेतील. या दरम्यान त्यांच्यात कृषी, आरोग्य, शिक्षा आणि इतर स्थानिक मुद्यांवर चर्चा होईल.

भारतीय किसान युनियनच्या नेत्यांनी म्हटलंय की, बंगाल सरकारने राज्यातील शेतकऱ्यांसोबत नियमितपणे चर्चा केली पाहिजे. उत्तर प्रदेशात प्रत्येक महिन्याला जिल्हाधिकाऱ्यांसोबत होणाऱ्या बैठकीचा हवाला देत त्यांनी म्हटलंय की, ही नीती देशात सगळीकडे लागू व्हायला हवी.

टीएमसीसाठी केला होता टिकैत यांनी प्रचार

कोरोनाची दुसरी लाट ओसरल्यानंतर आता पुन्हा एकदा आपल्या आंदोलनाची धार वाढवण्यासाठी टिकैत प्रयत्न करत आहेत. आजची भेट हा याच प्रयत्नाचा भाग आहे. याआधी यावर्षीच्या मार्च-एप्रिलमध्ये बंगाल विधानसभा निवडणुकीदरम्यान शेतकरी नेते राकेश टिकैत यांनी तृणमूल काँग्रेससाठी प्रचार देखील केला होता. यासोबतच ममता बॅनर्जींनी देखील वेळोवेळी या शेतकरी आंदोलनाच्या बाजूनेच आवाज उठवला आहे. तृणमूलचे अनेक खासदार देखील दिल्लीच्या सीमेवरील शेतकरी आंदोलनाच्या ठिकाणी हजर राहिले होते.