भारतातही अनेक अल-जवाहिरी; त्यांना निवडून मारावे लागेल - खासदार रवी किशन

नवी दिल्ली : अल कायदा या दहशतवादी संघटनेचा प्रमुख अल-जवाहिरी (Al Zawahiri) याची हत्या मोठी उपलब्धी आहे. असे अनेक अल-जवाहिरी भारतातही लपले आहेत. एका जवाहिरीच्या मृत्यूने दहशतवाद संपत नाही. एक मारला तर हे लोक हजार तयार करतात. भारतातही अल-जवाहिरी काश्मीर, आसामसारख्या भागात सक्रिय आहे. अशा सर्व अल-जवाहिरीला निवडून मारावे लागेल, असे भाजप खासदार रवी किशन (Ravi Kishan) म्हणाले.

अफगाणिस्तानमध्ये (Afghanistan) अमेरिकेने केलेल्या हवाई हल्ल्यात अल कायदाचा म्होरक्या अल-जवाहिरी मारला गेला आहे. ओसामा बिन लादेन अमेरिकेच्या कारवाईत मारला गेल्यानंतर जवाहिरी अल-कायदाचा नेता बनला. अमेरिकेचे राष्ट्राध्यक्ष जो बायडन म्हणाले की, जवाहिरी त्याच्या काबुलच्या घरी कुटुंबासह लपल्याची माहिती अमेरिकेच्या गुप्तचरांना मिळाली होती.

अल-जवाहिरी (Al Zawahiri) व ओसामा बिन लादेन यांनी अमेरिकेवर ९/११च्या हल्ल्याची योजना आखली होती. ओसामा बिन लादेनला २ मे २०११ रोजी अमेरिकेच्या नेव्ही सील्सने पाकिस्तानात केलेल्या कारवाईत ठार केले होते. अमेरिकन सैन्याने अफगाणिस्तान सोडल्यानंतर ११ महिन्यांनी दहशतवादविरोधी महत्त्वपूर्ण कारवाईत अमेरिकेला हे यश मिळाले आहे.

अल कायदाला मजबूत करण्यात अल-जवाहिरीने महत्त्वाची भूमिका बजावली होती. १९९८ पासून त्याने लादेनच्या छत्राखाली आणि नंतर त्याचा उत्तराधिकारी म्हणून काम केले. एका वरिष्ठ गुप्तचर अधिकाऱ्याने दिलेल्या माहितीनुसार, अल-जवाहिरी ज्या घरात मारला गेला ते घर तालिबानचा सर्वोच्च नेता सिराजुद्दीन हक्कानीच्या एका उच्चपदस्थ सहकाऱ्याचे आहे.