मुसेवालाच्या हत्येचा संबंध तिहार तुरुंगाशी, लॉरेन्स बिश्नोईची SIT कडून चौकशी

नवी दिल्ली : पंजाबी गायक आणि काँग्रेस नेते सिद्धू मुसेवाला यांच्या हत्येनंतर अधिकाऱ्यांनी दिल्लीच्या तिहार तुरुंगातील कैदी लॉरेन्स बिश्नोईच्या सेलमध्ये झडती घेतली आहे. या हत्येमागे लॉरेन्स बिश्नोईची टोळी आणि कॅनडास्थित गँगस्टर गोल्डी ब्रार यांनी घेतली आहे. त्यानंतर ही झडती घेण्यात आली आहे. या दरम्यान, अधिकाऱ्यांना काही संशयास्पद वस्तू आढळून आल्या आहेत. दरम्यान, सिद्धू मुसेवाला यांच्या हत्येनंतर तपासासाठी विशेष तपास पथक (SIT) स्थापन करण्यात आल्याचे पोलीस महासंचालकांनी सांगितले.

दरम्यान, यानंतर पंजाब पोलीस तिहार जेलला भेट देणार असून, बिश्नोईला ताब्यात घेण्याची शक्यता वर्तवली जात असून, अद्यापर्यंत याबाबत कारागृह विभागाला पंजाबकडून कोणतीही सूचना मिळालेली नाही. परंतु, बिश्नोई ब्रारच्या संपर्कात कसा होता आणि तुरुंगातूनच हल्ल्याची योजना कशी आखली होती, याची चौकशी केली जाईल असे एका वरिष्ठ पोलीस अधिकाऱ्याने सांगितले.

कोण आहे लॉरेन्स बिश्नोई

उत्तर भारतातील टॉप गँगस्टरपैकी एक असलेल्या बिश्नोईवर दिल्ली, राजस्थान आणि पंजाबमध्ये खून, दरोडा आणि खंडणीचे गुन्हे दाखल आहेत. अभिनेता सलमान खानच्या हत्येचा कट रचल्याप्रकरणी त्याचा जवळचा सहकारी संपत नेहरा याला 2018 मध्ये अटक करण्यात आली होती. दिल्लीस्थित गुंड कला जाठेदी हा देखील बिश्नोईच्या निकटवर्तीयांपैकी एक आहे. गेल्या वर्षी अटक होईपर्यंत जठेदी हा दिल्लीतील मोस्ट वॉन्टेड व्यक्ती होता. लॉरेन्स बिश्नोईच्या टोळीत 700 हून अधिक लोक असून त्यात एकापेक्षा जास्त शूटर असल्याचे सांगण्यात येत आहे. सध्या लॉरेन्स बिश्नोई तिहार तुरुंगात आहे.