आक्रमक झालेल्या शेतकऱ्यांना रोखण्यासाठी 'बॉर्डर'वर मोठा फौजफाटा

केंद्र सरकारने लागू केलेल्या कृषी कायदाच्या विरोधात शेतकऱ्यांनी आक्रमक भूमिका घेतली आहे. खासकरून पंजाब आणि हरियाणामध्ये मोठ्या प्रमाणात विरोध होताना दिसत आहे. काँग्रेसची सत्ता असलेल्या पंजाबमधील हजारो शेतकरी कृषी कायद्याच्या विरोधात रस्त्यावर उतरले आहेत. त्यांच्यासह अन्य काही राज्यातील शेतकऱ्यांनी 'दिल्ली चलो' आंदोलनात सहभागी होण्यासाठी कूच केली आहे. पण त्यांना रोखण्यासाठी प्रशासनाने चांगलीच कंबर कसल्याचे चित्र पाहायला मिळत आहे.    

दिल्लीमध्ये गुरुवारी आणि शुक्रवारी पंजाब, उत्तराखंड, राजस्थान हरियाणा, केरळ आणि उत्तर प्रदेशमधील शेतकरी आंदोलन करणार आहेत. कोरोनाच्या पार्श्वभूमीवर दिल्लीतील केजरीवाल सरकारने कोणत्याही प्रकारची रॅली काढण्यास परवानगी देणार नसल्याचे स्पष्ट केले आहे. आंदोलनासाठी दिल्लीच्या दिशेने येणाऱ्या शेतकऱ्यांना रोखण्यासाठी मोठा फौजफाटा सीमाभागात तैनात करण्यात आला आहे.