Ram Navami Violence : रामनवमी मिरवणुकीवर दगडफेक-गोळीबार; कलम 144 लागू, इंटरनेट सेवा बंद

Violence On Ram Navami In Bihar : बिहार शरीफमध्ये शुक्रवारी रामनवमी (Ram Navami) मिरवणुकीदरम्यान परिस्थिती आणखीनच बिघडली. शहरातील गगन दिवाण परिसरात दोन गटात जोरदार हाणामारी झाली.

यादरम्यान मोठ्या प्रमाणात रास्ता रोको करण्यात आला. वाद वाढल्यावर गोळीबारही सुरू झाला. या गोळीबारात पाच जण जखमी झाले असून, त्यांना उपचारासाठी रुग्णालयात दाखल करण्यात आलंय.

या दंगलीदरम्यान हल्लेखोरांनी अनेक वाहनं पेटवून दिली. सध्या परिस्थिती नियंत्रणात आहे. परिस्थिती नियंत्रणात आल्यानंतर घटनास्थळी मोठ्या प्रमाणात पोलीस बंदोबस्त तैनात करण्यात आला आहे. त्याचबरोबर कलम 144 लागू करून इंटरनेट सेवा (Internet Service) बंद करण्यात आली आहे.

रामनवमीच्या मिरवणुकीदरम्यान गगन दिवाण परिसरात हल्लेखोरांनी गोंधळ घालण्यास सुरुवात केली. काही वेळातच चेंगराचेंगरी झाली आणि जमाव अनियंत्रित झाला. लोक इकडं-तिकडं धावू लागले. यानंतर हल्लेखोरांनी डझनभर वाहनं पेटवून दिली. काही वेळातच संपूर्ण परिसराचं वातावरण बिघडलं.

हल्लेखोरांनी बेधडक गोळीबार सुरू केला. यात पाच जणांना गोळ्या लागल्याचं सांगण्यात येत आहे. त्याचवेळी परिस्थिती चिघळल्यावर प्रशासनानं मोठ्या प्रमाणात पोलीस बंदोबस्त तैनात केला. सध्या परिस्थिती नियंत्रणात आहे. अफवांकडं दुर्लक्ष करून शांतता राखण्याचं आवाहन जिल्हा प्रशासनानं केलंय.