Tejas Fighter Aircraft : राजस्थानातील जैसलमेर जिल्ह्यात तेजस हलके लढाऊ विमान कोसळले

जैसलमेर : राजस्थानातील जैसलमेर जिल्ह्यात तेजस हलके लढाऊ विमान आज कोसळले. सुदैवाने, वैमानिक सुखरूप बचावला. प्रशिक्षणावेळी ही दुर्घटना घडली. स्वदेशी बनावटीच्या तेजस विमानाचा हा पहिलाच अपघात आहे.

हवाई दलाच्या निवेदनात म्हटले आहे, की प्रशिक्षण सुरू असताना तेजसचा अपघात झाला. अपघातातून वैमानिक सुखरूप बचावला. या अपघाताचे नेमके कारण शोधण्यासाठी चौकशी समिती स्थापन करण्यात आली आहे, अशी माहितीही दिली आहे. या अपघाताचा व्हिडिओ व्हायरल झाला असून त्यात कोसळलेल्या विमानातून मोठ्या प्रमाणावर काळा धूर बाहेर निघताना दिसतो. अपघातानंतर घटनास्थळी जमलेली बघ्यांची गर्दी पोलिसांनी पांगविली. जैसलमेरमधील कल्ला वसाहतीजवळ हे विमान कोसळले असले तरी अपघातात कसलीही जीवित किंवा वित्तहानी झाल नाही, असे जैसलमेरचे पोलिस उपअधीक्षक महेंद्रसिंह यांनी सांगितले. स्वदेशी बनावटीच्या तेजस विमानाची निर्मिती हिंदुस्थान ॲरोनॉटिक्स लि.ने केली आहे.

‘भारत शक्ती’ जवळ दुर्घटना

पंतप्रधान नरेंद्र मोदी यांच्या उपस्थितीत पोखरणमध्ये‘भारत शक्ती’ हा संरक्षण दलांचा सराव सुरू असतानाच तेथून १०० कि.मी.वर तेजस विमान दुर्घटनाग्रस्त झाले. लष्करासह हवाई दल, नौदलाने या सरावात भाग घेतला. तिन्ही दलाचे प्रमुख अधिकारीही सरावाला उपस्थित होते.