Heatwave : अबब! उन्हाचा पारा ५१ अंशांवर; पुढचे तीन ते चार दिवस रेड अलर्ट

नवी दिल्ली : उत्तर भारतात उष्णतेची लाट आणखी तीव्र झाली असून राजस्थानमधील फालोदी गावातील तापमानाचा पारा रविवारी ५१ अंशांवर गेला होता. राजस्थानमध्ये पुढील तीन ते चार दिवस असेच तापमान राहणार असून हवामान विभागाने येथे ‘रेड अलर्ट’ जारी केला आहे.

देशात मागील काही दिवसांपासून अनेक राज्यांमध्ये उष्णता वाढली असून उत्तर भारतात उष्णतेची लाट आली आहे. तापमानात दोन ते तीन अंशांनी वाढ झाली आहे. राजधानी दिल्ली आणि राष्ट्रीय राजधानी क्षेत्रातही आज ४७ अंशांच्या आसपास तापमान होते. देशात सर्वाधिक तापमान आज राजस्थानमधील फालोदी गावात नोंदले गेल्याचे हवामान विभागातील वरिष्ठ शास्त्रज्ञ नरेशकुमार यांनी सांगितले.

याठिकाणी ५१ अंश तापमान नोंदले गेले. राजस्थानसह उत्तर भारतात पुढील तीन ते चार दिवस असेच तापमान राहणार आहे. हवामान विभागाने राजस्थान आणि हरियानासाठी ‘रेड अलर्ट’ जारी केला आहे. पंजाबमध्येही दोन दिवस ‘ऑरेंज अलर्ट’ असून नंतर येथेही ‘रेड अलर्ट’ असेल, असे नरेशकुमार यांनी सांगितले.
वाढत्या उन्हामुळे दैनंदिन जनजीवनावर परिणाम झाल्याचे दिसून आले आहे. अनेक जण दुपारी घराबाहेर पडण्याचे टाळत आहेत. दिल्लीमधील काही शाळांना चार दिवसांची सुटी जाहीर करण्यात आली आहे.

राजस्थानमधील तापमानस्थिती

(अंश सेल्सिअसमध्ये)
फालोदी : ५१
जैसलमेर : ४८
बिकानेर : ४७.२
चुरू : ४७
जोधपूर : ४६.९
कोटा : ४६.३