Car Accident : कार अपघातात तीन बालकांसह चौघांचा मृत्यू; चालकाचे गाडीवरील नियंत्रण सुटल्याने दुर्घटना

बंगळूर : चळ्ळकेरेजवळ मोटारीवरील चालकाचे नियंत्रण सुटल्याने ती एका पुलावर आदळली, यात तीन मुलांसह एकाच कुटुंबातील चार जणांचा (Challakere Motor Accident) मृत्यू झाला. गुरुवारी पहाटे हा अपघात घडला.

सिंधूश्री (वय २), अय्यळप्पा (वय ५ महिने), रक्षा (वय ३ महिने) आणि रायचूर जिल्ह्यातील देवदुर्गा तालुक्यातील दंडमहळ्ळी येथील लिंगप्पा (वय २६) हे मरण पावले. अपघातात जखमी झालेले यल्लम्मा (३०), मल्लम्मा (२०) आणि नागप्पा (३५) यांना चळ्ळकेरे तालुक्याच्या रुग्णालयात दाखल केले आहे.

त्यापैकी दोघांची प्रकृती चिंताजनक आहे. चालक झोपेत असल्याने पहाटेच्या सुमारास ही दुर्घटना घडली. वृत्त समजताच पीएसआय शिवराज यांनी घटनास्थळी भेट देऊन पाहणी केली. चळ्ळकेरे पोलिसांनी गुन्हा दाखल करून पुढील तपास सुरू केला आहे.

दुसऱ्या एका घटनेत धारवाडमध्ये झालेल्या अपघातात दुचाकीस्वाराचा मृत्यू झाला. धारवाड तालुक्यातील हेब्बळ्ळी-तळवाई रस्त्यावर अपघात झाला. तळवाई गावातील बसवराज जट्टानवर (वय ३२) हे मृत दुचाकीस्वार होते. हेबळी येथून घरी जात असताना हा अपघात झाला. धारवाड ग्रामीण पोलिसांनी गुन्हा दाखल केला आहे.